Аман өһө 8 - Сибэтиэй Биибилийэ кинигэлэрэ

Дириҥ муударас ыҥырыыта

¹ Истиҥ эрэ, Дириҥ муударас ыҥырар саҥата иһиллэр, кини оттомноох куолаһа эҥсиллэр буолбатах дуо?

² Айан суолун үрдүнэн томтор оройугар ыттан, арыт икки суол быһа охсуһуутугар тиийэн,

³ арыт куорат олбуорун айаҕар – тастан киирэ түһүүгэ кэлэн – кини ааһан иһээччилэргэ амалыйар:

⁴ «Мин эһигини бар дьону ыҥырабын, эһиэхэ киһи аймахха туһулаан этэбин!

⁵ Кэнэннэр, мындыр буола үөрэниҥ, тутах өйдөөхтөр, тобуллаҕас толкуйданыҥ!

⁶ Истиҥ мин дьоһуннаах суоллары этэрбин: мин эһиэхэ кырдьыгы эрэ биллэрэбин,

⁷ дьиҥи эрэ иһитиннэрэбин эбээт, албын-көлдьүн тылтан сиргэнэбин.

⁸ Онон мин этэрим барыта кырдьыктаах – албыны-түөкэйи, сымыйаны саҥарбаппын.

⁹ Өйдөөх киһи истэригэр, мин этэрим барыта дьэҥкэ, билиилээх киһиэхэ – барыта тиийимтиэ.

¹⁰ Эһиги мин үөрэтэр үөрэхпин үрүҥ көмүстээҕэр өрө тутуҥ, мин биэрэр билиибин ыраас кыһыл көмүстээҕэр ордоруҥ.

¹¹ Муударас – ханнык да бэйэлээх эриэккэс таастааҕар күндү; бу дойдуга эһиги баҕара саныыргытыттан киниэхэ тэҥнэһэр кыахтаах суох.

¹² Мин, Дириҥ муударас, мындыр өйү кытта бииргэ олоробун, бигэ билии, олохтоох толкуй эмиэ миэхэ бааллар.

¹³ Айыы Тойоҥҥо ытыктабыл – кири-дьайы абааһы көрүү. Улаханнык сананыы, бэрдимсийии, мөкү суол-иис, албын-көлдьүн тыл – бу барыта мин абааһы көрөр суолум.

¹⁴ Миэхэ баар сүбэ-ама, миэхэ баар ситиһии, мин өркөн өйбүн, бар дьоҥҥо күүһү-уоҕу эмиэ мин биэрэбин.

¹⁵ Мин көмөбүнэн ыраахтааҕылар ыраахтааҕылыыллар, баһылыктар кырдьыктаах сокуоннары таһаараллар,

¹⁶ бары норуоттар сирдьиттэрэ, кинээстэр, сир судьуйалара бука бары мин көмөбүнэн салайаллар.

¹⁷ Миигин таптыыр киһини мин эмиэ таптыыбын; ким миигин дьулуһан туран көрдүүр, ол булуоҕа.

¹⁸ Баай-дуол, үтүө аат-суол, уостубат уйгу быйаҥ уонна көнө дьүүл – барыта миэхэ баар.

¹⁹ Мин бэлэҕим кыһыл көмүстээҕэр, тоҥ көмүстээҕэр да, ордук, мин ыраас үрүҥ көмүстээҕэр күндүбүн.

^20-21 Миигин таптааччылары байытан биэрэр, кинилэр күндү баайдарын толоро турар туһугар, мин кырдьык аартыгынан сылдьабын, көнө дьүүл суолун тутуһабын.

²² Айыы Тойон аан бастаан, атын тугу да айыан иннинэ, айанын аартыгар миигин туруорбута.

²³ Мин үллэр үйэлэр иннилэринэ, былыр-былыр, аан дойду айыллыан инниттэн баар буолбутум,

²⁴ улаҕатын урсуна көстүбэт улуу байҕал, устата-туората биллибэт уу төрдө үөскүөн иннинэ төрөөбүтүм.

²⁵ Ол саҕана өссө ханнык да таас хайа, ханнык да буор булгунньах оҥоһулла илигэ,

²⁶ сир-дойду кэтит киэбэ, киэҥ сыһыылар, бэл диэтэр, биир ытыс буор кытта айылла иликтэрэ.

²⁷ Айыы Тойон халлааннары бэлэмнииригэр онно мин эмиэ баарым; Кини киэҥ далайы кырыйа саҕах иитин чэрчилии тардарыгар,

²⁸ халҕаһа былыттары кыраман үрдүккэ өрө үтэйэн таһаарарыгар, улуу муоралары угуттуур уу төрдүн аһарыгар,

²⁹ ыйбыппын аһара диэлийбэтин диэн, байҕал кытылын бэлиэтээн биэрэригэр, сир акылаатын түһэрэригэр –

³⁰ мин, мындыр маастар курдук, Айыы Тойоннуун бииргэ сылдьарым, Кинини күннэтэ үөрдэрим; Айыы Тойонум иннигэр мин үөрэр-көтөр эрэ этим –

³¹ Кини сирин эйгэтин көрөн өрө көтөҕүллэрим, киһи аймаҕы анааран өрөгөйдүүр буоларым.

³² Дьэ онон, оҕолоруом, миигин истиҥ: ким мин суолбун тутуһар, ол дьоллоох.

³³ Эһиги мин үөрэтэрбин ылынан, муударай дьон буолуҥ, эппиппин барытын бигэтик тутуһуҥ.

³⁴ Ким күннэтэ мин олбуорум айаҕар кэлэн турар, мин олорор дьиэм ааныттан хараҕын араарбакка, миигин өйдөөн-дьүүллээн истэр, ол дьоллоох.

³⁵ Тоҕо диэтэххэ, миигин булар киһи олоҕу булар, Айыы Тойон илгэлээх үтүөтүгэр тиксэр.

³⁶ Оттон ким миигин утарар, ол бэйэтигэр куһаҕаны оҥостор; ким миигин абааһы көрөр, ол өлөр өлүүнү таптыыр».