Аман өһө 29 - Сибэтиэй Биибилийэ кинигэлэрэ

¹ Сэмэлииллэрин истэ-истэ көннөрүммэт өһөс киһи, өрүһүммэттии, эмискэ бүдүрүйүөҕэ.

² Үтүө киһи үксээтэҕинэ, норуот үөрэр-көтөр, оттон куһаҕан дьон салайдаҕына, сору көрөр.

³ Муудараһы таптыыр уол аҕатын үөрдэр, оттон содур дьахталлардыын куодарыһааччы баайын эһэр.

⁴ Көнө дьүүллээх ыраахтааҕы дойдутун туругурдар, оттон бэрик ылааччы айгыратар.

⁵ Доҕоругар ньылаҥныыр киһи кинини дэҥ үктэтэр.

⁶ Куһаҕан киһи аньыы угаайытыгар киирэн биэрэр, оттон үтүө киһи үөрэ-көтө, ыллыы-туойа сылдьар.

⁷ Көнө судьуйа дьадаҥы дьон дьыалатын-куолутун өйдүүр, оттон куһаҕан киһи болҕойо да барбат.

⁸ Баламаттар куораты аймыыллар, оттон муударайдар араллаантан быыһыыллар.

⁹ Өйдөөх киһи акаарыны кытта сууттаһан – кинини ытатан да, ыллатан да – уоскулаҥы булуо суоҕа.

¹⁰ Хаанымсахтар көнө киһини абааһы көрөллөр, ол эрээри кинини үтүө дьон көмүскүөхтэрэ.

¹¹ Акаары кыыһыран быыппастар, оттон муударай кыатанар.

¹² Баһылык сымыйаны сэҥээрэр буоллаҕына, үлэһиттэрэ бары сидьиҥ быһыыланыахтара.

¹³ Дьадаҥы уонна кинини атаҕастааччы биир маарыннаһар өрүттээхтэр: иккиэн Айыы Тойон көмөтүнэн күн сырдыгын көрөн сылдьаллар.

¹⁴ Дьадаҥыны көнөтүк дьүүллүүр ыраахтааҕы бүрүстүөлэ үйэттэн үйэҕэ туругура туруоҕа.

¹⁵ Оҕо, таһыллан, дьарыллан, муудараска уһуллар, оттон най барбыт оҕолор ийэлэрин саакка угаллар.

¹⁶ Куһаҕан дьон күүһүрбүт сиригэр аньыы-буруй үксүүр, ол эрээри көнө дьон кинилэр самналларын көрүөхтэрэ.

¹⁷ Уолгун уостуганныы сырыт, оччоҕо оҕоҥ дууһаҕын дуоһутуо, сүрэххин үөрүүнэн толоруо.

¹⁸ Таҥара ыйыыта-кэрдиитэ суох норуот үүнэ-тэһиинэ суох барар, оттон Сокуону тутуһар норуот алгыһы ылар.

¹⁹ Кулуту кыһыл тылгынан көннөрбөккүн: өйдүүрүн өйдүө эрээри, толоро барыа суоҕа.

²⁰ Толкуйдаабакка эрэ чап гыннарар киһини көрбүтүҥ дуо? Киниэхэ эрэниэхтээҕэр акаарыга эрэммит ордук.

²¹ Кулуккун кыра эрдэҕиттэн баскар ытыардаххына, кэлин баайгын былдьаан ылаары тииһиэҕэ.

²² Киҥнээх киһи иирээннээх, ыгым киһи халыҥ аньыылаах.

²³ Улаханнык санаммыт намтыаҕа, оттон сытыары майгылаах ытыктаныаҕа.

²⁴ Ким уоруйахтыын биир күөстээх, ол бэйэтигэр кыр өстөөх – суукка андаҕайан да баран, кырдьыгы эппэт.

²⁵ Ким дьонтон куттанар, ол угаайыга киирэн биэрэр, оттон ким Айыы Тойоҥҥо эрэллээх, ол көмүскэллээх.

²⁶ Баһылыгы кытта үчүгэйдии буолуохтарын үгүстэр баҕараллар эрээри, дьылҕаҕын Айыы Тойон быһаарар.

²⁷ Көнө дьон албынньыты, куһаҕан дьон кырдьыксыты туора көрөллөр.