Аман өһө 22 - Сибэтиэй Биибилийэ кинигэлэрэ

¹ Үтүө аат-суол үлүскэн үптээҕэр ордук, дьон-сэргэ ытыктабыла көмүстээҕэр күндү.

² Баай уонна дьадаҥы биир майгыннаһар өрүттээхтэр: хайаларын да Айыы Тойон айбыта.

³ Өйдөөх киһи алдьархай ааҥнаан эрэрин көрдөҕүнэ, саһар, оттон кэнэн – иннин хоту баран киирэн биэрэр.

⁴ Айыы ТойонУ ытыктыыр көрсүө-сэмэй дьоҥҥо баай-дуол, үтүө аат-суол уонна уһун олох тосхойуо.

⁵ Сымыйаччы суола-ииһэ барыта – эрбэһин икки угаайы икки, олоҕун күндүргэтэр киһи оннук суолунан барыа суоҕа.

⁶ Уол оҕону айанын аартыгар такайдахха, сорсуйан да баран, ол суолуттан туоруо суоҕа.

⁷ Баай дьадаҥыга тойон, иэстээх иэс биэрээччигэ кулут.

⁸ Сиэрэ суох быһыыланааччы иэдээҥҥэ түбэһиэҕэ, көҥүл күөдүлгэхтээбитэ уурайыаҕа.

⁹ Аччыктаабыты аһатар амарах киһи Айыы Таҥара алгыһын ылыаҕа.

¹⁰ Кэрээнэ суоҕу үүрэн кэбис, оччоҕо иирээн намырыа, үөхсүү-этиһии уурайыа.

¹¹ Ыраас сүрэхтээх, үтүө тыллаах-өстөөх киһини ыраахтааҕы доҕор оҥостуоҕа.

¹² Айыы Тойон кырдьыгы кыраҕытык маныыр, уодаһыннаахтар албын тылларын саралыыр.

¹³ Сүрэҕэ суох этэр: «Таһырдьа хахай сылдьар! Таҕыстым да, миигин тырыта тыытар!»

¹⁴ Содур дьахтар тыла-өһө – чөҥөрө чүөмпэ, онно Айыы Тойон уордайбыт киһитэ түһүөҕэ.

¹⁵ Уол оҕо сүрэҕэр уйаламмыт акаары санааны чыпчаххай тоҕо тэбээн таһаарыаҕа.

¹⁶ Барыһырар туһугар дьадаҥылары атаҕастыыр, баайдарга бэрик биэрэр киһи быста дьадайыаҕа.

Отут муударай этии

¹⁷ Аны билигин кулгааххын чөрбөтөн муударай өйдөөхтөр тылларын иһит, эйиэхэ үөрэтэрбин болҕойуоххунан болҕой.

¹⁸ Бу тыллары сүрэххэр сөҥөрөн сылдьарыҥ бэйэҕэр үөрүүлээх буолуоҕа, онон, кимниин да буоллун, үллэстэргэ өрүү бэлэм сырыт.

¹⁹ Айыы Тойоҥҥо бигэ эрэллээх буоларыҥ туһугар, бу бүгүн эйигин үөрэтэн эрэбин.

²⁰ Мин эйиэхэ отут этиини суруйдум, онон мантан үтүө сүбэни, бигэ билиини сомсоҥҥун

²¹ эн дьиҥ кырдьык тылыгар үөрэниэҥ, эйигин үөрэттэрэ ыыппыт дьоҥҥор үтүө хоруйдаах эргиллэр кыахтаныаҥ.

– 1 –

²² Кыра-хара эрэ диэн дьадаҥыны халаама, куорат олбуорун айаҕар турар кыһалҕалааҕы атаҕастаама:

²³ Айыы Тойон, кинилэр муҥатыйалларын иһиттэҕинэ, былдьаан ылбыт буруйгар дууһаҕын былдьыаҕа.

– 2 –

²⁴ Уордааҕы кытта бодоруһума, ыгымы кытта ыксалаһыма,

²⁵ аны кинилэри үтүктэн дэҥ үктэниэҥ, кэнтиккэ киирэн биэриэҥ.

– 3 –

²⁶ Илии бэрсэргэ тиэтэйимэ, атын киһи иэһин төлүөх буолан эрэннэримэ.

²⁷ Тугунан да төлүүр кыаҕыҥ суох буоллаҕына, утуйар тэллэххин кытта туура тутан ылыахтара.

– 4 –

²⁸ Сириҥ-уотуҥ былыргы быыһын – өбүгэлэриҥ быыһаабыттарын – сыҕарытыма.

– 5 –

²⁹ Үлэтин-хамнаһын кыайа тутар мындыр киһини эн көрбүтүҥ дуо? Кини ыраахтааҕыга үлэлиэҕэ – көннөрү дьоҥҥо үлэлиэ суоҕа.