Аман өһө 18 - Сибэтиэй Биибилийэ кинигэлэрэ

¹ Дьонтон туора туттааччы бэйэтэ билэринэн сылдьар, сиэрдээх сүбэни-аманы иһиттэҕинэ, үөхсэр.

² Акаары уһуну-киэҥи толкуйдуу да барбат – өйдөөҕүмсүйэрин эрэ билэр.

³ Сидьиҥ киһи сэнэбилгэ сылдьар, куһаҕан киһи аата алдьанар.

⁴ Киһи тыла-өһө – чөҥөрө чүөмпэ, муударас төрдө – сүүрүктээх үрэх.

⁵ Сиэрэ суох быһыы – хара дьайдааҕы быыһаан ылыы, кырдьыксыты көнө дьүүлтэн матарыы.

⁶ Хоҥ мэйии иирээни тардар, хой баһын туойан кырбанар.

⁷ Акаары киһи тылыттан иэдэйэр, айах мээнэ тыллаһан киирэн биэрэр.

⁸ Хобуоччу тыла-өһө минньигэһэ сүрдээх – искэр-үөскэр дириҥник өтөн киирэр.

⁹ Сүрэҕэ суох үлэһит да, хорон сиэччи да – иккиэн ини-биилиилэр.

¹⁰ Айыы Тойон аата – халыҥ хахха, суон дурда: кырдьыксыт онно хорҕойон быыһаныаҕа.

¹¹ Баай киһиэхэ үбэ-аһа – бөҕө кириэппэһэ; санаатыгар, ол эркинин туох да хотутар кыаҕа суох.

¹² Үрдүктүк санаммыт үгдэрийэр, оттон көрсүө-сэмэй чиэстэнэр.

¹³ Ситэ истибэккэ эрэ хоруйдааһын – ааргы быһыы, сааттаах суол.

¹⁴ Күүстээх санаалаах киһи ыарыыны тулуйар, оттон кута-сүрэ тостубут хайдах туруулаһыаҕай?

¹⁵ Ким өйдөөх, ол билиитин хаҥатар, ким муударай, ол билиигэ-көрүүгэ тардыһар.

¹⁶ Бэлэх-туһах аан аһар – тойотторго аһардар.

¹⁷ Суукка бастакынан этинээччи көрдөрүүтэ өрүү сөптөөх курдук эрээри, утарсааччыта кэлэн, кини эппитин тургутан көрөр.

¹⁸ Түөрэх кэбиһии мөккүөрү быһаарар, күүстээх утарсааччылары араарар.

¹⁹ Хомоппут быраатыҥ хатаммыт кириэппэс кэриэтэ, өстөһүү – олбуор аанын олунуу.

²⁰ Саҥарбытыҥ бэйэҕэр салаллыа, эппитиҥ бэйэҕэр эргиллиэ.

²¹ Тыл киһини өлөрөр да, өрүһүйэр да күүстээх; ким тылга тииһэр, ол элбэххэ эппиэттиир.

²² Үчүгэй дьахтары ойох ылбыт киһи күндү баайдаммыт, Айыы Тойон үтүөкэн бэлэҕин ылбыт.

²³ Дьадаҥы ааттаһан саҥарар – баай хаҕыстык хардарар.

²⁴ Сорох сымыйанан доҕор-атас буолан кубулунар, ол эрээри ардыгар бырааккынааҕар да таптыыр доҕор баар буолар.