Аман өһө 14 - Сибэтиэй Биибилийэ кинигэлэрэ

¹ Муударай дьахтар дьиэ-уот тэринэр, оттон акаары – дьиэтин бэйэтинэн үрэйэр.

² Ким Айыы ТойонУ ытыктыыр, ол көнө суолунан сылдьар, оттон улахаҥҥа уурбат киһи буруйан барар.

³ Акаары арбанабын диэн алдьанар, оттон муударай киһи көрсүө тылынан быыһанар.

⁴ Ким оҕуһа суох, ол бурдуга эмиэ суох, оттон ким буулаҕа оҕустанар, ол баһаам барыстанар.

⁵ Эрэллээх туоһу кырдьыгы этэр, албын туоһу кураанаҕы эрдэр.

⁶ Баламат киһи муудараһы көрдөөн да, булуо суоҕа, оттон өйдөөх киһи үөрэҕи кэбэҕэстик ылынар.

⁷ Акаарыттан тэйэ тутун – киниттэн ыллыктаах тылы истиэҥ суоҕа.

⁸ Өйдөөх киһи муударай – барар суолун билэр, оттон акаары толкуйа суох – бэйэтин эрэ албыннанар.

⁹ Акаарылар аньыыны оҥороллорун көргө холууллар, оттон көнө дьон Таҥара алгыһын ылаллар.

¹⁰ Сүрэҕиҥ тоҕо ытыырын эн бэйэҥ эрэ билэҕин, үөрүүгүн эмиэ ким да толору үллэстэр кыаҕа суох.

¹¹ Куһаҕан киһи уораҕайа урусхал буолуоҕа, үтүө киһи үүтээнэ чэчирии туруоҕа.

¹² Сорох суол, көрдөххө, көнө курдук эрээри, тиһэҕэр өлүүгэ тиэрдэр.

¹³ Ардыгар, күлэ да турдаххына, сүрэҕиҥ ытыыр, үөрүүҥ эмиэ хомолтонон солбуллар.

¹⁴ Түктэри кэмэлдьилээх көрдөөбүтүн булуоҕа, үтүө киһи өҥөтө эмиэ толору төлөнүөҕэ.

¹⁵ Өс киирбэх истибитин барытын итэҕэйэр, оттон өйдөөх киһи хас хардыытын толкуйданар.

¹⁶ Муударай киһи сэрэнэр – куһаҕантан тэйэн биэрэр, оттон акаары баламат – туохтан да куттаммат.

¹⁷ Уолҕамчы киһи ааргытык быһыыланар, уодаһыннааҕы ким барыта абааһы көрөр.

¹⁸ Ньүдьү-балай бэлиэтэ – ньүкэн быһыы, өйдөөх киһи ситиһиитэ – бигэ билии.

¹⁹ Хара дьайдаахтар көнө дьоҥҥо кэлэн бокулуоннуохтара, куһаҕан дьон үтүө киһи олбуорун айаҕар кэлэн тоҥхойуохтара.

²⁰ Дьадаҥыны бэл аймаҕа кытта абааһы көрөр, оттон баай киһи доҕоро-атаһа өрүү элбэх.

²¹ Атыттары сэниир киһи аньыыны оҥостор, оттон дьадаҥыга көмөлөһөөччүгэ дьол тосхойор.

²² Куһаҕаны торумнааччы мунан-тэнэн барыаҕа, оттон үтүөнү оҥорооччу итэҕэли, ытыктабылы ылыаҕа.

²³ Киһи хаһан даҕаны сыралаһан байар; кураанаҕы куолулааччы быстарар.

²⁴ Өйдөөхтөр ситиһиилэрэ – муударас, оттон акаары акаарытынан сураҕырар.

²⁵ Эрэллээх туоһу дьон олоҕун өрүһүйэр, оттон уодаһыннаах – сымыйаны кутар-симэр.

²⁶ Айыы Тойоҥҥо ытыктабыл – бигэ көмүскэл, бэйэҕэр да, ыччаккар да халыҥ харысхал.

²⁷ Айыы Тойоҥҥо ытыктабыл – өлбөт мэҥэ уута – өлүү ситимиттэн өрүһүйэр.

²⁸ Халыҥ норуоттаах ыраахтааҕы албан аатырар, кыра норуоттаах ыраахтааҕы быстарар.

²⁹ Ким киэҥ көҕүстээх, ол дириҥ өйдөөх, оттон ыгым акаарытын көрдөрөр.

³⁰ Киэҥ-холку киһи чэгиэн-чэбдик буолар, оттон ордугумсах, күнүүһүт – доруобуйатын айгыратар.

³¹ Дьадаҥылары атаҕастааччы кинилэри Айбыты атаҕастыыр, кыһалҕалаахтарга кыһанааччы кинилэри Айбыты ытыктыыр.

³² Куһаҕан киһи аньыытын-буруйун иһин киэр анньыллыаҕа, оттон үтүө киһи өлөн да иһэн эрэллээх сытыаҕа.

³³ Дириҥ муударас өйдөөх сүрэххэ дьиэлэнэр, акаарылар да ортолоругар бэйэтин биллэрэр.

³⁴ Үтүө быһыы норуоту үрдэтэр, оттон аньыы-буруй түһэрэр.

³⁵ Ыраахтааҕы өйдөөх үлэһитигэр үтүөтүк сыһыаннаһыаҕа, оттон кинини түһэн биэрээччигэ уордайыаҕа.