Maleko 3 - Yaubada wasana: Buka Hauhauna tupwana

Sabati unai Yesu ye kabihenamwanamwa

¹ Sabati hesau Yesu ye mwalaesae sunago unai, na tamowai hesau nimayabayababana temenai.

² Paliseya tamowaidiyao hekadi Yesu kana mata se wasenei, unai iya se kitasipwanamwanamwaei, kabo Sabati unai tamowai ne ye henamwanamwa e nige. Ena ye henamwanamwa, kabo unai se hegilu.

³ Kabo Yesu ye hededelau tamowai nimayabayababana wa unai ye wane, “Ku toloma.”

⁴ Na ye henamaiyedi ye wane, “Laulau saha ye namwa ede mayadai Sabati unai: namwa ta ginauli o yababa, ta kabihenamwa o ta kaiunu?” Maudoidi wa se mwanouhai.

⁵ Ye kitahetakikilidi, na ye kouyalayala yo nuwana ye yababa, matawuwuna ede se nuwakwailolokalili. Na ye hededelau tamowai wa unai ye wane, “Nimam ku heleleyama.” Kabo nimana wa ye helelelaei, ede Yaubada nimana wa ye henamwanamwa.

⁶ Na kabo Paliseya tamowaidi se lau Heloda kana bodao maiyadiyao se koitalaliu idohagi Yesu bena kabo se unui.

Bodalakilaki Yesu se hemuliwatani

⁷ Na kabo Yesu maiyana hekahekatao se dahalai se lau Galili Gabwana unai, na Galili tamowaidi gwaudi se hemuliwatani.

⁸ Yesu saha ye ginauli wa wasana se lapui meta bodalakilaki teha Yudeya yo Yelusalema yo Idumeya yo Yolidani teha kaluwabu udiyedi yo hinage Taiya yo Sidona magaidi udiyedi se laoma iya unai.

⁹ Boda ye lakikalili unai madai Yesu se dudukahalaei, ede Yesu ye hededelau yona hekahekatao udiyedi bena waga gagilina se kabinonohai, unai bena kabo ye gelu.

¹⁰ Na taukasiyebwa gwaudi ye henamwanamwadiko, unai kabo tamowai kasikasiyebwadi maudoidi se dudu se lau bena se kabilau Yesu unai.

¹¹ Na tamowai yaluwa yabayababadi kalidiyena wa iya se kita ede se tulibono iya talanuwana unai, na yaluwa yabayababadi wa se yogayoga se wane, “Kowa Yaubada natuna ede!”

¹² Yesu kabo ye guguyaidi tabu se hededehemasalaha iya kaiteya.

Yesu yona hekahekatao saudoudoi-labui ye hetolodi

¹³ Yesu ye sae koya hesau tupina unai. Temenai kaiteyadi ye henuwadi wa ye yoganedi na se laoma iya unai.

¹⁴ Na Saudoudoi-labui ye kaisunuwaidi yo hesadi ye tole apostolo bena maiyanao se miya, yo bena kabo ye hetamalidi se lau se lauguguya.

¹⁵ Na yona gigibwali ye mosei siya udiyedi, kabo yaluwa yababadi se hededehepesadi.

¹⁶ Teina saudoudoi-labui ye yoganedi wa hesadi ede: Simona, hesana hesau ye tole Petelo,

¹⁷ Yamesi ma kana kaha Yowane, Sebedaiyo natunao, hesadi ye tole Bowanele, meta kaniyona ede, “Tulutululu natunao”,

¹⁸ Andeleya, Pilipo, Batolomaiyo, Mataiyo, Tomasi, Yamesi Alepaiya natuna, Tadaiyo, Simona Tauhaikabi,

¹⁹ yo Yudasi Isakaliyota, iya ede Yesu kana tauwalohai.

Yesu kana bogao iya bena se woyahai

²⁰ Kabo Yesu ye mwalaesae numa hesau kalona unai, na bodalakilaki se lagegogoꞌuyoma. Na iya maiyana hekahekatao nige yodi solasola bena se kaikai.

²¹ Na Yesu kehanao wasana se lapui meta Yesu nige ye kaikai, unai se lau iya bena se woyahai, matawuwuna ede se nuwatui se wane, “Iya bena ye bwadebwade!”

Laugagayo taulauhekata Yesu yona gigibwali se hededeheyababa

²² Laugagayo taulauhekata hekadi Yelusalema unai se dobima se wane, “Satani iya luwana ne unai! Yaluwa yababadi ye hededehepesadi yodi wasawasa yona gigibwaliyena.”

²³ Yesu ye yoganedi na palabole hekadi ye hedededi kalidiwai, ye wane, “Satani kabo idohagi na Satani ye hededehepesa?

²⁴ Taba basileiya kesega se haitoledagela, kabo basileiya ne nige gonowana ye tolobayao.

²⁵ Taba boga kesega se haitoledagela, kabo boga ne nige gonowana se tolobayao.

²⁶ Taba Satani ye bom ye hewahewaiunuꞌuyoi na nuwana ye labulabui, kabo nige gonowana ye tolobayao, na ye kaiyawasi.

²⁷ Nige gonowana tamowai hesau ye mwalae tamowai yasiyasiyalana yona numa unai yona gogo ye haidi. Tamowai yasiyasiyalana wa taba ye paibagunai, na kabo yona numa gogodi ye haidi.

²⁸ Ya hededemamohoi: Yababa maudoidi yo Yaubada hededeyababaina Yaubada kabo ye nuwatugabaedi.

²⁹ Na taba tamowai hesau Yaluwa Tabuna ye hededeheyababa, kabo yona yababa wa taba nige ye nuwatugabaei. Kana gilu kabo ye bawahai ye lau ee nige kana siga.”

³⁰ Yesu yona hedehedede ta matawuwuna ede se wane, “Yaluwa yababana ye luwu iya unai.”

Yesu kana boga mamohoidi

³¹ Na Yesu sinana yo kana kahao se lagema dagela wa unai se totolo, na tamowai hesau se hetamali ye sae bena ye woihaei.

³² Boda Yesu se tulihetakikili wa se hededelau iya unai se wane, “Sinam yo kam kahao yo loumwao, siya ede dagela ne unai na se henuwago.”

³³ Na ye henamai ye wane, “Sinagu kaiteya? Yo kagu kahao kaiteyadi?”

³⁴ Tamowai iya se tulihetakikili wa ye kaikewaidi na ye wane, “Sinagu yo kagu kahao ede teina!

³⁵ Kaiteya Yaubada yona nuwatu ye ginauliwatani meta iya kagu kaha ede, lougu ede, yo sinagu ede.”