Hebelu 1 - Youbada wasana: Buka Houhauna tupwana

Yaubada Natuna Yesu iya ye saekalili

¹ Huya bagubagunana unai Yaubada hedehedede ye moseidi peloweta udiyedi huya udoiꞌudoi udiyedi yo laulau udoiꞌudoi udiyedi, na kabo se hededegabaedi kada mumugao udiyedi.

² Na teina huya mulimulitana ta unai Yaubada yona hedehedede ye mosei Natuna unai, na iya ye hededelaoma kalidawai. Natuna iya ede Yaubada maiyana tanoubu maudoina ta se hetubu wa, yo Yaubada iya ye kaisunuwai kabo ginauli maudoidi ye mosehekawadi unai.

³ Natuna Tamana yona didiga yo hinage kana kao dudulaina ye hemasalahadi kalidawai yo ginauli maudoidi ye hebayaodi yona hedehedede gigibwalina unai, to bena se miyahai. Baꞌaya kabaheꞌaꞌana ye ginauli, na mulinawai kabo ye tulidobi Wasawasa Saesaena nimatutunaena galewa unai.

Yesu ye saekalili na kabo anelu

⁴ Teina unai ye masalaha meta Natuna ye saekalili na kabo anelu, yo hinage gonogonowana doha iya hesana ye saekalili na kabo anelu hesadiyao.

⁵ Matawuwuna Yaubada nige ye hededelau anelu hesau unai ye wane, “Kowa yau natugu, mayadai ta unai ya hemala tamam.” (Same 2:7) o hinage, “Yau kabo tamana na iya kabo natugu.” (2 Samuwela 7:14)

⁶ Yo huyana Yaubada Natuna taubaguna ye hetamaliyama tanoubu ta unai, iya hedehededena ye hedehededei ye wane, “Yaubada yona anelu maudoidi taba se kaihelahui.” (Dutelonomi 32:43)

⁷ Yona anelu hedehedededi ye wane, “Yona anelu ye ginaulidi [yodi sagena] doha yaumai, yo yona heyayai tauhaidi [yodi gigibwali] doha kaiwa pulupululuna.” (Same 104:4)

⁸ Na Yaubada ye hededelau Natuna unai ye wane, “Yaubada, yom kabatuli kabo ye miya nige kana siga, yo yom basileiya ne kabo laulaududulai unai ku tanuwagai.

⁹ Kowa laulau dudulaina ku henuwa na laulau yabayababadi ku subudi. Unai Yaubada, iya yom Yaubada, ye heyausigo gwauyala yausina unai. Teina unai ye kitahesaego kam kahao maudoidi luwadiwai.” (Same 45:6-7)

¹⁰ Hinage [ye hededelau Natuna unai ye wane], “Guiyau, huya bagubagunana unai kowa tanoubu wuwuna ku tole yo hinage galewa meta nimam ginaulina. (Same 8:6, Sakaliya 12:1)

¹¹ Siya kabo se tauwadam, na kowa ku miyahai. Kabo se beyabeya doha kaleko beyabeyana.

¹² Kabo ku nokudi doha kaleko, yo doha luwuluwu beyabeyana kabo ku haigabaedi na hauhaudi ku toledi. Na kam kao gonogonowana mo yo yom bolimai taba nige kadi siga.” (Same 102:25-27)

¹³ Yo Yaubada nige anelu hesau unai ye hededelau ye wane, “Nimatutugu ta unai ku tuli, kana siga kam waiunu ya toledi kaem kabatoledi.” (Same 110:1)

¹⁴ Na anelu meta siya yaluyaluwa yo heyayai tauhaina mo, na Yaubada ye hetahetamalidi bena mauli tauhaidi se saguidi.