Pa gə́ ur dɔ paje 1 - Maktub gə́ To gə Kəmee

¹ Pa lə Salomo̰ gə́ maji ur dɔ paje lai.

Sor kɔr lə njéndigi na̰je (Ŋgoma̰də)

² Maji karee il ɓɔlm gə təa ya Mbata ndigi gə́ i ndigim lé Lelm ur dɔ mán-nduú’g.

³ Lelm ur dɔ baḭ ubu’g ləi gə́ i ndèm lé. Rɔi gə́ bura ya ə̰də maji To gə́ ubu ə̰də taa loo yal-yal bèe, Gelee gə́ nee ɓa ŋgama̰dje ndigii ne.

⁴ Ilam gooi’g ar sí j’aiŋgwɔd j’aw! I gə́ to mbai ləm lé Maji kari aw səm mee kəi’g ləi, Ar sí n’raje rɔlel ləm, Ar sí j’isije dan boo-rɔkal’g gə mbata ləi ya, Ar sí ndubaje rɔ sí dɔ ndigi’g ləi J’aree ur dɔ ka̰ mán-nduú’g. Ndigi gə́ deḛ ndigii lé to lée’g ya.

⁵ Ŋganje gə́ dené gə́ Jerusalem, Ma lé m’ndul konono To gə́ kəi-kubuje gə́ Kedar bèe Nɛ ma maji péd-péd To gə́ pal-kubu-gaŋg-mee-kəi lə Salomo̰ bèe tɔ.

⁶ Maji kar sí oreeje dɔ ndul’g ləm ba el, To kàr ɓa ram am m’ndul ya. Meḛ ŋgakɔmje gə́ diŋgam ḭ sə dee jugugu dɔm’g Ar dee d’undam gə́ njeŋgəm ndɔ-nduúje. Ndɔ-nduú ləm-ma ndá ma m’ŋgəm el.

⁷ Ǝi, i gə́ m’ndigii dɔɓəŋgərəm’g, Ulam loo gə́ i ar badje ləi D’aw d’o̰ mu keneŋ ləm, Gə loo gə́ i aw ar dee d’wa rɔ dee keneŋ Loo gə́ kàr aar daŋdɔ lé ləm tɔ. See gelee ban ɓa m’ila ne mbir-mbir Mbɔr koso-nékulje’g lə marije bèe wa.

(Njékulbadje)

⁸ Ǝi, i dené gə́ ma̰də ur dɔ marije’g, Ɓó lé i gər el ndá Maji kari un dɔ gɔl badje, Aw gə bya̰je ləi ar dee d’o̰ mu Mbɔr kəije’g lə njékulbadje ya.

(Basa)

⁹ Ǝi njemɔr ləm, Ma̰də kunda lə Parao̰ gə́ ndɔr pusu-rɔje lé Ma m’wá m’wɔjii ne ya.

¹⁰ Kwojii maji péd-péd mbuna némbije’g ləi ləm, Gwɔbi to ɗḛ́rḛ́g dan mərje’g ləm tɔ.

(Njékulbadje)

¹¹ J’a ra néɗɔi-rɔije gə larlɔr Gə́ ndaŋgee mèr ləm, gə larnda ləm tɔ.

(Ŋgoma̰də)

¹² Loo gə́ mbai ləm Si gə ta ka-nésɔ’gə́ ləa ya ɓəi ndá Ubu ndam gə́ m’ndèm lé Baḭyee ə̰də sululu taa loo pəl-pəl.

¹³ Yeḛ gə́ m’undá dan kəm’g lé To kəm’g Asəna gə kul timbá gə́ to mbuna mbàm’g bèe.

¹⁴ Yeḛ gə́ m’undá dan kəm’g lé To asəna gə pudu (né gə́ ɓaree) hene Gə́ to mee ndɔ-nduúje gə́ En-Gedi.

(Basa)

¹⁵ Ǝi njemɔr ləm, I ma̰də gə́ ban ɓa bèe wa. I ma̰də gə́ ban ɓa bèe wa. Kəmi to asəna gə dərndaje bèe.

(Ŋgoma̰də)

¹⁶ I kura gə́ ban ɓa bèe wa. I gə́ m’undai dan kəm’g lé I maji dum ya. Tira-to sí to mu gə́ idi lururu.

¹⁷ Gaji kag lə kəije lə sí To kag-sɛdrəje ləm, Kunda-kag kəije lə sí To kag-siprɛsje ləm tɔ.