Loo gə́ killa rea kəm Ja̰’g 15 - Maktub gə́ To gə Kəmee

Bai-oŋg njekɔm’g siri lé

¹ Tɔɓəi ma m’oo boo-nétɔji gə́ raŋg dara gə́ to ɓəl kədm-kədm bèe: Kuraje gə́ dara siri d’isi gə tuji-boo gə́ siri, tuji neelé to rudu tuji ɓa mba kar oŋg lə Ala wəi ne bém.

² Tɔɓəi ma m’oo né asəna gə tad-mán gə́ dəa ndusu oso ɗəḭ-ɗəḭ bèe ar manee lé pélé gə́ pər ləm, deḛ gə́ dum da gə néndaji ria gə nétura gə́ ka̰ ria lé deḛ d’aar dɔ tad-mán’g neelé kṵdu-ko̰dè to ji dee’g ləm tɔ.

³ Deḛ d’ɔs pa lə Moyis, yeḛ gə́ to kura lə Ala ləm, gə pa lə Ŋgonbad lé ləm tɔ pana: Mbaidɔmbaije Ala, i gə́ to Bao-siŋgamoŋ lé Néraije to gə́ boo ləm, to ɓəl kədm-kədm ləm tɔ. I gə́ to mbai dɔ ginkoji dəwje gə raŋg lé Né gə́ i wɔji-kwɔji ra lé to gə dɔ najee ləm, Ta ləi to gə́ kankəmta ləm tɔ,

⁴ Mbaidɔmbaije, see na̰ ɓa a ɓəli kula ne rɔnduba dɔ rii’g el wa. Mbata i nja kára ba kiao to njerɔkunda. Ginkoji dəwje gə raŋg lai d’a ree d’a kunda barmba nɔḭ’g, Mbata rəwta-gaŋg ləi lé inja kəm dəwje’g ya.

⁵ Gée gə́ gogo m’aa loo gərərə ndá m’oo ta kəi-Ala gə́ wɔji dɔ dəb kəi gə́ to gə kəmee gə́ ka̰ kɔr goo ta lé teḛ to tag.

⁶ Kuraje gə́ dara gə́ siri gə́ d’isi gə tuji-boo gə́ siri lé d’unda loo mee kəi-Ala’g teḛ raga. Kubu gə́ d’ṵji gə kúla palégal gə́ àr ŋgad-ŋgad ləm, ndɔḭ yaa̰ ləm tɔ lé to rɔ dee’g ndá d’wa kaar dee gə ndar gə́ ra gə larlɔr tɔ.

⁷ Yeḛ gə́ kára mbuna nékundaje’g lə Ala gə́ d’aw kəmba sɔ lé odo bai-larlɔrje siri gə́ oŋg lə Ala gə́ njesikəmba gə ləbee-ləbee gə no̰ lé rusu tub-tub ndá yeḛ ar kuraje gə́ dara kára-kára siri lé.

⁸ Sa pər gə́ ka̰ rɔnduba lə Ala gə siŋgamoŋ ləa to lé taa mee kəi-Ala lé pəl-pəl. Dəw kára kara askəm kandə mee kəi-Ala’g el saar kar rudu tuji-boo gə́ siri lə kuraje gə́ dara neelé un ɗiao.