Pakɔsje 98 - Maktub gə́ To gə Kəmee

Njegaŋ-rəwta dɔ naŋg nee

1 Pakɔs lé.

¹ Pakɔs lé. Ɔsje pa gə́ sigi arje Njesigənea̰ Mbata yeḛ ra néje gə́ dumkoo ləm, Jikɔlee gə kag jia gə́ àr ŋgad-ŋgad ɓa lá səa.

² Yeḛ ar dee gər kaji ləa ya ləm, Yeḛ riba dɔ meekarabasur ləa Ar kəm ginkoji dəwje gə raŋg inja dəa’g ləm tɔ.

³ Yeḛ ar mée olé dɔ meemaji’g ləa gə dɔ meenda londoŋ’g ləa Gə́ wɔji dɔ gel-bɔje lə Israɛlje ləm, Kaji gə́ Ala lə sí aji sí ne lé D’oo gə loo lai-lai d’ɔr rudu naŋg nee njal ləm tɔ.

⁴ Seḭ dəwje lai gə́ síje dɔ naŋg neelé Ɔrje ndu sí gə́ tar wəl gə rɔlel par gə́ rɔ Njesigənea̰’g ya ləm, Ɔsje pa ndubaje ne rɔ sí gə boo-rɔkal ya ləm tɔ.

⁵ Ɔsje pa arje Njesigənea̰ gə kṵdu-kagje lə sí, Ɔsje ne pa kula rɔnduba dəa’g gə kṵdu-kagje lə sí lé ya.

⁶ Maji kar sí raje ne né ta yi-yi gə ndu to̰to̰ gə ndu ta̰rən lé Gə rɔlel no̰ mbai’g lə sí gə́ Njesigənea̰ lé tɔ.

⁷ Maji kar kaa baa-boo-kad gə néje lai gə́ to keneŋ lé Ɓar ɔr loo lɔi-lɔi ləm, Maji kar deḛ lai gə́ d’isi dɔ naŋg neelé Nduba rɔ dee gə boo-rɔkal ləm tɔ.

⁸ Maji kar mán baaje tal turu tuma̰-tuma̰ ləm, Maji kar dɔ mbalje lai-lai kara ra né wəl-wəl gə rɔlel ləm tɔ

⁹ No̰ Njesigənea̰’g ya, Mbata yeḛ ree gə mba gaŋg rəwta dɔ naŋg nee ya. Rəwta-gaŋg gə́ yeḛ a gaŋg dɔ dəwje gə́ dɔ naŋg neelé Yeḛ a gaŋg gə goo meekarabasur ya ləm, Ka̰ koso-dəwje lé kara Yeḛ a gaŋg gə dɔ najee ya ləm tɔ.