Pakɔsje 97 - Maktub gə́ To gə Kəmee

Njesigənea̰ to mbai gə́ njeko̰ɓee ya

¹ Njesigənea̰ lé o̰ ɓee, Maji kar dɔ naŋg nee to dan boo-rɔkal’g ləm, Maji kar dɔgoré-looje gə́ bula lé d’al rɔ dee ya ləm tɔ.

² Kil lə ndi gə loo gə́ ndul njudu-njudu lé D’aḭ dəa sub ləm, Meekarabasur gə néra gə́ gə dɔ najee lé ɓa To gə́ gin kalimbai ləa ləm tɔ.

³ Pər ɓa aw nea̰’g Roo njékoma̰ səaje gə́ gugu dəa sub lé.

⁴ Tel lə ndi ləa lé ndogó dɔ naŋg nee Ar naŋg oo ndá yə ne ɓugu-ɓugu ya.

⁵ Dɔ mbalje lé léḛ sələlə-sələlə Asəna gə ya̰-tḛji bèe no̰ Njesigənea̰’g, No̰ Mbaidɔmbaije gə́ to mbai dɔ naŋg nee lai.

⁶ Dara lé ila mber néreaje gə dɔ najee Ar koso-dəwje lai lé d’oo rɔnduba ləa ya.

⁷ Deḛ lai gə́ pole magəje lé Deḛ gə́ ti rɔ dee mbata magəje lə dee lé Kəm sɔḭ wa kəm dee. Magəje lai lé d’unda barmba dəb kəm dee naŋg nea̰’g.

⁸ Dəwje gə́ Sio̰ d’oo ndá Deḛ ra ne rɔlel ləm, Ɓee-booje gə́ Juda kara d’al ne rɔ dee ya ləm tɔ Ǝi Njesigənea̰ mbata rəwta-gaŋgje ləi lé ya.

⁹ Mbata i Njesigənea̰ to Njekurdɔloo gə́ dɔ naŋg nee lai ya, I lé boo ur dɔ magə-poleje gə́ dɔ naŋg nee lai.

¹⁰ Seḭ gə́ undaje Njesigənea̰ dan kəm sí’g lé Ǝ̰jije né gə́ majel bəḭ-bəḭ ya. Yeḛ tɔs kəmee bao-bao dɔ majikojije’g ləa Ɔr dee ne ji njémeeyèrje’g.

¹¹ Lookàr to mbata njéra nédanaje ləm, Rɔlel to mbata deḛ gə́ meḛ dee to kára ba sur ləm tɔ.

¹² Seḭ njémeekarabasurje lé Alje rɔ sí gin Njesigənea̰’g, Ilaje riɓar dəa’g gə pa pidije lə sí Mbata meenda londoŋ ləa.