Pakɔsje 93 - Maktub gə́ To gə Kəmee

Ala gə́ njeboo-ronduba

¹ Njesigənea̰ lé o̰ ɓee, Boo-ronduba lé yeḛ dolè ne rəa yul ya ləm, Siŋgamoŋ ləa kara yeḛ tɔ ne rḛgee ya ləm tɔ. Bèe ɓa naŋg lé ŋgəŋ ne ŋgəŋ-ŋgəŋ Ɓó né kára kara yə ŋgirá el.

² Kalimbai ləi to njaŋg kédé gə́ ləw-ləw ya saar ɓasinè ləm, I nja kara si gən kédé gə́ ləw saar gə nɔḭ ya ləm tɔ.

³ Ǝi Njesigənea̰, baa-booje tuga poŋgm-poŋgm ləm, Baa-booje neelé kaa dee ɓar u-u-u ləma, D’ula d’ar baŋga kula lə dee ɓar mbiao̰-mbiao̰ ləm tɔ.

⁴ Njesigənea̰ lé to njesiŋgamoŋ mee looje gə́ dará’g Ur ne dɔ baa-booje gə́ tuga poŋgm-poŋgm’g ləm, Ur ne dɔ ndu paŋgəm mán baa-boo-kad’g Gə́ turu tuma̰-tuma̰ lé ləm tɔ.

⁵ Ndukunje ləi lé to kankəmta ya Ɓó loo maḭyee godo, Ǝi Njesigənea̰, némeenda kɔr jol-jol to gə́ mee kəi’g ləi lé ya Gə ləbee-ləbee saar-saar gə no̰ ya.