Pakɔsje 87 - Maktub gə́ To gə Kəmee

Sio̰ to ko̰ɓee lə koso-dəwje lai

1 Pakɔs lə Koréje.

¹ Pakɔs lə Koréje. Ala nja tum gel ɓee neelé dɔ mbalje gə́ to gə kəmee doi’g.

² Njesigənea̰ ndigi tarəw ɓeeje gə́ Sio̰’g lé Ur dɔ loo-sije’g lə Jakob lai ya.

³ Taje gə́ ka̰ kula rɔnduba dɔi’g lé Deḛ pa taree d’wɔji ne dɔi-i ɓee-boo lə Ala ya.

⁴ Ma m’ɓar ri njé gə́ Ejiptə Gə njé gə́ Babilɔn lé mbuna deḛ gə́ gərm’g. Aa oo, ɓee lə Pilistije, gə Tirje, gə Etiopije lé to: Dəwje neelé d’oji dee mee ɓee’g neelé ya.

⁵ Nɛ deḛ pata d’wɔji ne dɔ Sio̰ pana: Deḛ lai d’oji dee keneŋ ləm, Njekurdɔloo’g lé aree ŋgəŋ ŋgəŋ-ŋgəŋ ləm tɔ.

⁶ Njesigənea̰ lé tura dee Gə goo ndaŋg gə́ yeḛ nja ndaŋg ri koso-dəwje neelé. Lée neelé ɓa d’oji dee keneŋ.

⁷ Deḛ gə́ d’ɔs pa gə deḛ gə́ ndam lé Ra né gə ndu dee gə́ boi wəl pana: Gin rɔlel lə sí lai ḭ rɔi’g ya!