Pakɔsje 84 - Maktub gə́ To gə Kəmee

Pa njaa kaw kəi-Ala’g

¹ Pakɔs lə Koréje gə́ d’ar bao-pa mba karee ɔs sə dee lé. D’ɔs gə nékim gə́ ɓaree gitit.

² Njesigənea̰, mbai gə́ njeboo-néje lé Kəi-siije taa kəm rəgm ya,

³ Ma lé m’ndiŋga rɔm M’əmə ta biriri-biriri par gə́ gadlooje’g lə Njesigənea̰ ləm, Darɔm gə ŋgaw məəm bura ra né wəl par gə́ rɔ Ala gə́ njesikəmba’g lé ləm tɔ.

⁴ Tḭtḭ iŋga kəi kula dəa keneŋ ləm, Ləbmsiri kara iŋga kəi ləa ɔm ŋganeeje keneŋ ya ləm tɔ Mbɔr loo-nékinjaməs’g ləi-i Njesigənea̰ gə́ njeboo-néje lé I gə́ to mbai ləm, gə Ala ləm lé ya.

⁵ Deḛ gə́ d’isi mee kəi’g ləi lé rɔlel nai sə dee ya, D’askəm pidi ya ɓəi.

⁶ Deḛ gə́ d’iŋga loo-gəd-rɔ lə dee rɔi’g lé Rɔ dee lel dee yaa̰, Rəwje lai gə́ teḛ rɔi’g lé D’wɔji meḛ dee’g kédé mba̰.

⁷ Loo gə́ deḛ d’unda kəm wəl-loo gə́ Baka gaŋg lé D’aree tel to loo gə́ kəm-rəw-manje taa loo keneŋ pəl-pəl ləm, Ndi gə́ ər dɔ loo’g neelé ar néje gə́ maji kinja keneŋ ləm tɔ.

⁸ Loo gə́ d’aw njaa lé ndá Siŋga dee ḭ dɔ maree’d gə́ kédé-kédé Ar dee teḛ ne Sio̰’g d’aar ne no̰ Ala’g lé ya.

⁹ Njesigənea̰, Ala gə́ njeboo-néje lé Maji kari oo tamaji gə́ m’ra tai’g ya, Ala lə Jakob, maji kari ur mbii gə́ rɔm’g ya tɔ.

¹⁰ Ǝi Ala, i gə́ to dər-rɔ lə sí lé maji kari oo ya, Maji kar kəmi to jḛ̀ dɔ yeḛ gə́ i wa dəa gə́ ubu lé ya.

¹¹ Kisi mee gadlooje’g ləi ndɔ kára ba lé Maji yaa̰ unda si loo gə́ raŋg’d ndɔ tɔl-dɔg (1.000). Karm m’aar tar tarəwkəi’g lə Ala ləm lé M’ndigi yaa̰ unda karm m’isi kəi-kubuje’g lə njémeeyèrje.

¹² Mbata Njesigənea̰, Ala to kàr ləm, gə dər-rɔ ləm tɔ, Meenoji gə rɔnduba lé Njesigənea̰ ɓa ar dee, Deḛ gə́ njaa gə goo rəw gə́ danasur lé Yeḛ ɔg dee némaji kára kara bèe el.

¹³ Njesigənea̰, mbai dɔ bao-rɔje Rɔlel a nai gə yeḛ gə́ ɔm mée dɔi’g jəb-jəb lé ya.