Pakɔsje 82 - Maktub gə́ To gə Kəmee

Pa kila ta dɔ njégaŋ-rəwtaje’g gə goo rəbee el

1 Pakɔs lə Asap.

¹ Pakɔs lə Asap. Ala aar loo-mbo̰-dɔ-na̰’d gə́ wɔji dɔ Ala. Yeḛ gaŋg rəwta mbuna magəje’g.

² See ndɔ gə́ ra ɓa seḭ a kəwje rɔ sí gaŋgje rəwta gə́ gə goo rəbee el lé wa. See ndɔ gə́ ra ɓa seḭ a kəwje rɔ sí kɔrje kəm njémeeyèrje lé ɓəi wa.

³ Maji kar sí ɔrje kəm ta lə dəw gə́ siŋgá godo gə ŋgonal lé ləm, Njenékəmndoo gə njendoo lé kara Raje sə dee gə goo rəbee ləm tɔ.

⁴ Njenékəmndoo gə yeḛ gə́ siŋgá godo lé Taaje dɔ dee ləm, Wa deeje wɔgədɔ ɔr deeje ji njémeeyèrje’g ya ləm tɔ.

⁵ Deḛ lé kəmkàr əsé gosonégər lə dee godo ləm, Deḛ njaa dan loondul’g ya ləm tɔ, Bèe ɓa loo gə́ dɔ naŋg nee lai yə ne.

⁶ Ma m’pa kédé lé m’pana: Seḭ lé toje gar Magəje ya, Seḭ lai toje ŋgalə Njekurdɔloo lé tɔ.

⁷ Nɛ seḭ a kwəije to gə́ dəwje ya ləm, Seḭ a tosoje ne asəna gə mbai-ɓee gə́ kari ba ləm tɔ.

⁸ Ǝi Ala, maji kari uba naŋg ḭtar, Gaŋ rəwta dɔ naŋg nee ya, Mbata ginkoji dəwje gə raŋg lai lé to gə́ kaḭ-i nja kára ba.