Pakɔsje 8 - Maktub gə́ To gə Kəmee

Boo-ronduba lə Ala

¹ Pa lə Dabid gə́ ar bao-pa mba karee ɔs sə dee lé. D’ɔs gə kṵdu-ko̰déje gə́ ɓaree gitit.

² Njesigənea̰, Mbaidɔmbaije lə sí, Maji kar rii ɓar mḭ dɔ naŋg nee gə loo mbidi-mbidi ya! Boo-ronduba ləi aw saar tur dɔ dara.

³ Ta gə́ teḛ ta ŋganje’g ləm, Gə ta ŋganje gə́ nai ta mbà’g ləm tɔ lé I tum ne gin siŋgamoŋ ləi keneŋ Dum ne dɔ njéba̰je ləi Mba tɔ ne ta njeba̰ ləi gə njedalba̰ lé ká.

⁴ Loo gə́ m’aa loo gə́ dara gəl-gəl lé M’oo kula gə́ i ra gə jii, M’oo naḭ gə kéréméje gə́ i unda dee lé

⁵ Am m’dəji ne rɔm m’pana: See dəw to gə́ ɗi ɓa i ar məəi olé dəa’g bèe wa. See ŋgon dəw lé to gə́ ɗi ɓa i tɔs kəmi bao-bao dəa’g bèe wa.

⁶ I undá aree nai lam bèe ndá a kas səi-i Ala ləm, I ula dɔgugu rɔnduba gə riɓar dəa’g ləm tɔ.

⁷ I aree dum dɔ nékundaje ləi gə́ i unda dee gə jii ləm, I ɔm néje lai gin gɔlee’g ya,

⁸ Ŋgan badje gə bɔ maŋgje Gə daje gəmee wala’g ləm, Gə yelje gə́ d’aw pə̰ dara’g ləm,

⁹ Gə ka̰jije gə́ dan baa-boo-kad’g ləma, Gə néje lai gə́ d’aw kəmba kəm-rəw-mán baa-boo-kad’g ləm tɔ.

¹⁰ Ǝi, Njesigənea̰, Mbaidɔmbaije lə sí, Maji kar rii ɓar mḭ dɔ naŋg nee gə loo mbidi-mbidi ya.