Pakɔsje 74 - Maktub gə́ To gə Kəmee

Pa no̰ mbata tuji gə́ oso dɔ kəi-Ala’g

1 Pakɔs lə Asap.

¹ Pakɔs lə Asap. Ǝi Ala, see gelee ban ɓa i uba dee ya̰ dee gə no̰ ɓəi wa. See gelee ban ɓa oŋg ləi ḭ səi gə́ kédé-kédé Ari ḭ ne gə koso-nékulje ləi Gə́ d’aar loo-ko̰-mu’g ləi lé tɔɓəi wa.

² Koso-dəwje ləi gə́ i taa dee kédé ləw ba lé Maji kari ar məəi olé teḛ dɔ dee’g ya, Deḛ gə́ i nja uga dɔ dee asəna gə ginkoji gə́ to gə́ nédɔji ləi bèe, Mbal gə́ Sio̰ gə́ i ra loo-sii keneŋ lé kara Ar məəi olé teḛ dɔ’g ya ləm tɔ.

³ Maji kari aw saar teḛ par gə́ mbuna looje neelé gə́ tuji gə́ kédé-kédé Mbata njeba̰ lé tuji néje lai mee kəi gə́ to gə kəmee’g.

⁴ Njékoma̰ seije lé d’ɔr ndu dee gə́ tar wəl mee kəi’g ləi gə́ to gə kəmee’g, Nétɔjije lə dee-deḛ nja d’unda keneŋ gə́ nétɔjije gə́ gəd.

⁵ D’oo dee asəna kára ba gə deḛ gə́ d’odo tinaje lə dee D’aw ne mee kag-kɔr gə́ ndər siŋ-siŋ’d bèe.

⁶ Waga ndá tinaje gə mo̰je lə dee lé Deḛ tuga ne néndajije gə́ tɔl dee gə́ to keneŋ.

⁷ Deḛ d’ula pər kəi ləi gə́ to gə kəmee doi ləm, Kəi gə́ rii ɓar dɔ’g lé Deḛ kunda təd d’ula ne sul dɔ’g ya ləm tɔ.

⁸ Deḛ pa meḛ dee’g kəi pana: Ar sí n’raje sə deḛ lai né gə́ kərm-kərm! Looje lai gə́ to gə kəmee mee ɓee’g neelé deḛ roo dula-dula ya.

⁹ Nétɔjije lə síjeḛ lé j’oo kára kara bèe el ləm, Njetegginta kára kara godo ləma, Dəw kára kara mbuna sí’g gər to gə́ né neelé a to saar kunda ŋgaŋgee ra wa bèe el ləm tɔ.

¹⁰ Ǝi Ala, saar ndɔ gə́ ra ɓa njekula kəmloondoo lé a kila ndɔl dɔ loo’g Esé njeba̰ lé a kḛji ne rii bəḭ-bəḭ lal kəw ne rəa ɓəi wa.

¹¹ See gelee ban ɓa i ɔm jii kaari’g bèe wa. Maji kari wa jii gə́ tar tuji dee ne.

¹² Ala to mbai ləm un kudee kédé gə́ ləw saar ɓasinè, Yeḛ nja ɓa gə́ njegelkaji lə dəwje gə́ dɔ naŋg nee.

¹³ I gaŋg baa-boo-kad dana gə goo siŋgamoŋ ləi ləm, Da-kɔb gə́ dan mán’g lé i tɔ ka dəaje réb-réb ya ləm,

¹⁴ I iri ka dɔ mar njigi-njigi ləma, I un ar koso-dəwje gə́ dɔdilaloo’g lé gə́ nésɔ dee ya ləm tɔ.

¹⁵ I ar kəm-rəw-manje gə ŋgira-manje tuba tir-tir ləm, Man baaje gə́ d’yi kédé gə́ ləw el lé I ar dee tudu kurum-kurum ləm tɔ.

¹⁶ Lookàr gə loondul lé to kaḭ ya ləm, I ra naḭ gə kàr ləm tɔ.

¹⁷ I wɔji rəw-nim-naŋgje lai ar dee to njaŋg ləm, I unda naḭ kàr gə naḭ ɓar lé ləm tɔ.

¹⁸ Maji kari gər gao, to gə́ njeba̰ lé Ila ndɔl dɔi-i Njesigənea̰’g ləm, Koso-dəwje gə́ to mbəje lé D’ə̰ji rii bəḭ-bəḭ ləm tɔ.

¹⁹ Maji kari ya̰ koso-dəwje ləi ta daje’g el ləm, Njénékəmndooje ləi lé ar məəi wəi dɔ dee’g gə no̰ el ya ləm tɔ.

²⁰ Maji kari ə̰ji goo ta manrɔ lé Mbata looje gə́ to bigim mee ɓee’g neelé Ar gayim-dəwje taa ne loo keneŋ pəl-pəl.

²¹ Maji kar yeḛ gə́ d’ula kəmee ndòo lé Tel gə́ ɓée gə rɔkul el ləm, Maji kar njenékəmndoo gə njendoo lé D’unda no̰ rii ya ləm tɔ.

²² Ǝi Ala, maji kari uba naŋg ḭta aḭ bada dɔ ta’g ləi. Ar məəi olé teḛ dɔ ta ndɔlje’g lə mbə-dəwje Gə́ d’ila dɔi’g gə ndɔ dee ndɔ dee.

²³ Ar məəi wəi dɔ kunda bula yi-i-i lə njéba̰je ləi lé el ləm, Kaw dɔ na̰’d pum-pum lə deḛ gə́ ḭ dɔ maree’d gə́ kédé-kédé əw el lé Ar məəi wəi dɔ’g el ləm tɔ.