Pakɔsje 67 - Maktub gə́ To gə Kəmee

Tamaji gə́ ra loo kinja kó’g lé

¹ Pakɔs gə́ ar bao-pa mba karee ɔs sə dee lé. D’ɔs gə nékimje gə́ gə kuláje.

² Maji kar Ala oo kəm sí lootondoo’g Tɔr ne ndia dɔ sí’g ləm, Maji kar kəmee to dɔ sí’g jḛ̀ ləm tɔ.

³ Mba kar deḛ gə́ dɔ naŋg nee gər ne rəw ləi ləm, Mba kar ginkoji dəwje gə raŋg kara gər ne rəw-kaji lé ləm tɔ.

⁴ Ǝi Ala, maji kar koso-dəwje lé pidii, Maji kar koso-dəwje lai d’ɔs gajii ya.

⁵ Maji kar ginkoji dəwje gə raŋg d’al rɔ dee D’isi ne dan boo-rɔkal’g, Mbata i gaŋgta dɔ koso-dəwje’g lé gə goo rəbee ya ləm, I ɔr no̰ ginkoji dəwje gə raŋg gə́ dɔ naŋg neelé ləm tɔ.

⁶ Ǝi Ala, maji kar koso-dəwje lé pidii, Maji kar koso-dəwje lai d’ɔs gajii ya.

⁷ Naŋg lé kinja gə nésɔje ɓagəsa ya, Ala gə́ to Ala lə sí lé tɔr ndia dɔ sí’g.

⁸ Maji kar Ala tɔr ndia dɔ sí’g ləm, Maji kar dəwje lai gə́ d’isi rudu naŋg’d lé Ɓəlee ya ləm tɔ.