Pakɔsje 66 - Maktub gə́ To gə Kəmee

Pidije Ala dɔ néreaje’g lé

1 Pakɔs lə Dabid gə́ ar bao-pa mba karee ɔs sə dee lé.

¹ Pakɔs lə Dabid gə́ ar bao-pa mba karee ɔs sə dee lé. Seḭ dəwje lai gə́ dɔ naŋg neelé Arje ndu rɔlel lə sí ɓar wəl-wəl gə́ rɔ Ala’g lé.

² Ɔsje pa ulaje ne rɔnduba dɔ ria’g ləm, Ɔsje gaji rɔnduba ləa gə pa pidije lə sí lé ləm tɔ.

³ Ulaje Ala pajena: Néraije lé to ɓəl kədm-kədm, Njéba̰je ləi lé kara bɔr bèli Mbata boo-siŋgamoŋ ləi ya.

⁴ Deḛ lai gə́ dɔ naŋg neelé D’unda barmba dəb kəm dee naŋg nɔḭ’g, D’ɔs pa d’ula ne rɔnduba dɔi’g ləm, Pa gə́ wɔji dɔ rii ɓa d’ɔs ya ləm tɔ.

⁵ Gə́ reeje, aaje néraje lə Ala ooje! Loo gə́ yeḛ ra né ar dəwje ndá Yeḛ to ɓəl kədm-kədm.

⁶ Yeḛ tel baa-boo-kad lé aree to naŋg gə́ tudu kurum-kurum ləm, Baa lé kara ar dee dəs keneŋ gə gɔl dee ya ləm tɔ. Ndəa neelé jeḛ lé j’al ne rɔ sí rəa’g ya.

⁷ Siŋgamoŋ ləa ɓa yeḛ o̰ ne ɓee dɔ loo’g gə ləbee-ləbee saar gə no̰, Yeḛ orè kəmee sḭ dɔ ginkoji dəwje gə raŋg’g lé, Maji kar njékɔsta-rəwje d’ḭ səa el!

⁸ Seḭ koso-dəwje lé Undaje no̰ dɔkaisəgərə lə Ala lə sí ləm, Arje pa pideeje lé kara ɓar gə loo mbidi-mbidi ya ləm tɔ.

⁹ Mbɔl dəa ɓa j’isije ne kəmba, Yeḛ ya̰ loo ar gɔl sí unda ndolè el.

¹⁰ Ǝi Ala, i nja naa sí I naa sí to gə́ deḛ ndiri ne lar loo-kula-bṵda’g bèe.

¹¹ I nja ree sə sí ar sí j’oso ba̰də’g ləm, I nja unda nékodo gə́ wɔi dɔ sí’g ləm,

¹² I nja ar dəwje d’isi gə́ dəw dɔ sí ləma, I ar sí n’dəsje dan pər’g gə dan mán’g ləm tɔ. Nɛ i tel ɔr sí keneŋ ar sí j’isije dan némajije’g bèdèg ya.

¹³ M’a kaw mee kəi’g ləi gə nékinjanéməsje gə́ ka̰ roo ləm, M’a tɔl ne ta ndukunje ləm gə́ m’un m’ari lé bém ya ləm tɔ,

¹⁴ To ndukunje ləm gə́ tam teḛ am m’pa taree Loo gə́ m’isi ne dan néurti’g.

¹⁵ M’a kinja badje gə́ rɔ dee ər ndəb-ndəb gə́ nékinjanéməsje Gə́ m’a roo kari na̰’d gə ubu bàl bya̰je. M’a kinja badje gə bàl bya̰je na̰’d gə́ nékinjanéməsje kari ya.

¹⁶ Seḭje lai gə́ ɓəlje Ala Gə́ reeje urje mbi sí gèŋ Amje m’ɔr sor né gə́ yeḛ ra mbata ləm lé m’ar sí ooje.

¹⁷ Ndum ya m’no̰ ne wəl gə́ rəa’g ləm, M’ar ta pideeje teḛ tam’g ya ləm tɔ,

¹⁸ Ɓó lé m’lɔm dɔ néra gə́ kori-kori məəm’g ndá Mbaidɔmbaije a kam né gə́ m’dəjee lé el.

¹⁹ Nɛ Ala orè mbia ndəŋ dɔ ndukwɔi’g ləm Ndá am ne né gə́ m’dəjee lé

²⁰ Maji kar dɔ ri Ala ai səgərə Mbata yeḛ ɔs ndukwɔi ləm rəw el ləm, Meemaji gə́ yeḛ ra səm kara Yeḛ əw rəa el ləm tɔ.