Pakɔsje 65 - Maktub gə́ To gə Kəmee

Pa kɔr sor néraje lə Ala

¹ Pakɔs lə Dabid gə́ ar bao-pa mba karee ɔs sə dee lé.

² Ǝi Ala, d’a pidii Kɔm ne meḛ dee dɔi’g mee ɓee gə́ Sio̰’g, Ndukunje gə́ d’un d’ari lé kara D’a ra tɔl bém ya tɔ.

³ I gə́ njekoo tamaji lə dəwje lé Dəwje lai d’a ree rɔi’g ya.

⁴ Néra gə́ kori-korije lé al dɔm sula ya, I a kar məəi ti mbidi dɔ kaltaje’g lə sí.

⁵ Dəw gə́ i ɔr kəmee aree rəm pər gə́ rɔi’g Mba si mee gadlooje’g ləi lé Débee neelé rɔlel nai səa ya. Rɔlel lə kəi ləi gə kàr ŋgad-ŋgad lə kəi ləi gə́ to gə kəmee A kas sí nag-nag ya.

⁶ Néraije gə́ dum koo lé I ila sí ne keneŋ gə goo meemaji ləi, I Ala gə́ njekaji sí lé Dəwje lai gə́ d’isi əw rudu naŋg’d ləm, Gə deḛ gə́ d’isi dɔgoré-looje’g dan baa-boo-kad’g lé ləm tɔ D’unda meḛ dee yel gə́ dɔi’g ya.

⁷ Siŋgamoŋ ləa ɓa ar mbalje lé ndər ne dɔ na̰’g tim-tim ləm, Siŋgamoŋ lé ɓa yeḛ tɔ rḛgee’g ləm tɔ.

⁸ Kaa kula lə baa-boo-kad gə́ ɓar ujuju-ujuju ləm, Gə kaa paŋgəm manee gə́ turu tuma̰-tuma̰ ləma, Gə ndu koso-dəwje gə́ ɓar u-u-u ləm tɔ lé Yeḛ ɔg ar loo to ndiŋ.

⁹ Deḛ gə́ d’isi gwɔi naŋg’d lé néraije gə́ dumkoo Ar ɓəl unda dee ne badə gaŋg dee, Boo-rɔkal ləi lé taa loo pəl-pəl par gə́ bər ləm, gə dɔ-gó ləm tɔ.

¹⁰ I nja ila kəmi dɔ naŋg’d Aree kinja ne gə néje bula ləm, Ar nébaoje taa ne rəa pəl-pəl ləm tɔ. Kəm-rəw-mán lə Ala mán rusu télélé-télélé, I wa dɔ gɔl kó néje loo gə́ i wa ne dɔ gɔl loo-dubu-né.

¹¹ I tər mán dɔ ɓaiyeje’g ləm, I gɔl ne dɔ kɔr na̰geeje ləm tɔ, Ma̰-ndi ɓa i yɔlé ne naŋg ləm, I tɔr ne ndui dɔ kandə néje’g ar dee d’uba ləm tɔ.

¹² I ula rɔnduba dɔ ləb némeemajije’g ləi, Loo gə́ i njaa keneŋ lé naŋg kinja gə néje gə́ gə ria-ria,

¹³ Ndag-looje gə́ dɔdilaloo’g lé d’iŋga mán d’ai ləm, Dɔ diŋgri looje d’al ne rɔ dee ləm tɔ,

¹⁴ Loo-ko̰-muje lə nékulje lé badje taa loo keneŋ pəl-pəl ləm, Kəm wəlje lé kara kó to keneŋ dai-dai ləm tɔ, Yee ɓa ndu rɔlelje gə pakɔsje ɓar ne wəl-wəl.