Pakɔsje 62 - Maktub gə́ To gə Kəmee

Mbɔr Ala’g lé loo ɓəl godo keneŋ

¹ Pakɔs lə Dabid gə́ ar bao-pa mba karee ɔs sə dee gə goo ta lə Jedutun lé.

² Oiyo, loo si lɔm ləm lé To mbɔr Ala’g lé ya kára ba, Yeḛ nja ɓa gə́ njegin kajim gə́ m’aji ne.

³ Oiyo, yeḛ lé to biri mbal ləm Gə njegin kaji ləm ya ləm tɔ. Yeḛ to njo̰loo-kula-dɔ ləm gə́ to tar sab, Bèe ɓa né a yə ne ŋgiram yaa̰ el.

⁴ See ndɔ gə́ ra ɓa seḭ a kəwje kḭ kɔmje na̰ dɔ dəw’g lé wa. See ndɔ gə́ ra ɓa seḭ lai a kəwje kḭ saŋgje loo mbata kṵdáje Kareje to asəna gə ndògo-bɔrɔ gə́ to podé lé Esé asəna gə ŋgalaŋ gə́ unda naŋg bèe lé wa.

⁵ D’ɔm meḛ dee na̰’d téréré Gə mba kɔs dəw neelé gə́ loo-siée to tar sab karee oso tuji ne, D’al rɔ dee dɔ taŋgɔm’g, Dɔ ta dee ɓa ndutɔr ḭ keneŋ Nɛ meḛ dee gə́ kəi lé ta ndɔl ɓa teḛ keneŋ tɔ.

⁶ Oiyo, maji kam m’isi lɔm mbɔr Ala’g lé ya kára ba ɓa Mbata meekundayel ləm lé ḭ rəa’g ya.

⁷ Oiyo, yeḛ lé to biri mbal ləm gə njegin kaji ləm ya tɔ. Yeḛ to njo̰loo-kula-dɔ ləm gə́ to tar sab. Bèe ndá m’a kunda ndolé nda̰ el.

⁸ Ala nja kára ba ɓa kaji ləm gə rɔnduba ləm d’ḭ rəa’g. Biri mbal gə́ to siŋgam ləm, gə njo̰loo-kula-dɔ ləm ləm tɔ lé to rɔ Ala’g lé ya.

⁹ Seḭ koso-dəwje lé kàr gə́ rara kara Maji kar sí ɔmje meḛ sí dəa’g, Tegje ginta gə́ to meḛ sí’g areeje! Mbata Ala to njo̰loo-kula-dɔ lə sí ya.

¹⁰ Oiyo, dəwje lé to né gə́ əḭ el. Dəwje lé to néŋgɔm to! Ɓó lé orè dee na̰’d wɔji kwɔi lə dee dɔ nékwɔji-kwɔi lə néje ndá D’wɔilɔ pélé-pélé unda lel gə́ tó pu bèe ba ya.

¹¹ Undaje meḛ sí dɔ néraje gə́ kərm-kərm’g el ləm, Undaje meḛ sí yel dɔ né gə́ taa gə buguru’g el ləm tɔ. Loo gə́ nébaoje un kudu kḭ dɔ maree’d gə́ kédé-kédé ndá Undaje meḛ sí yel gə́ dɔ’g el.

¹² Ala pata gɔl kára ba ya, Yee gə́ gɔl joo ləa lé m’oo oso mbim’g pana: Siŋgamoŋ lé to ka̰ Ala nja kára ba.

¹³ Meemaji kara ḭ rɔi-i Mbaidɔmbaije’g Mbata i lé uga nana kara gə goo kula rəa-rəa ya.