Pakɔsje 57 - Maktub gə́ To gə Kəmee

Dabid no̰ ɓar Njesigənea̰ gə́ Njekurdɔloo’g

1 Pakɔs lə Dabid gə́ bao-pa ɔs sə dee lé. D’ɔs gə ndu gwɔs gə́ pana: Ya̰ aree tuji el. Ndəa gə́ Dabid iya ne rəa mee bolè mbal’g loo gə́ Sawul tuba ne gée lé .

¹ Pakɔs lə Dabid gə́ bao-pa ɔs sə dee lé. D’ɔs gə ndu gwɔs gə́ pana: Ya̰ aree tuji el. Ndəa gə́ Dabid iya ne rəa mee bolè mbal’g loo gə́ Sawul tuba ne gée lé.

² Ǝi Ala, maji kari oo kəm lootondoo’g, Oo kəm lootondoo’g ya kari, Mbata m’saŋg njo̰loo-kula-dɔ ləm rɔi’g.

³ Ma m’ra né gə ndum gə́ boi wəl M’ɓar ne Ala gə́ to Njekurdɔloo’g, M’ɓar ne Ala gə́ to njera né la ne səm.

⁴ Yeḛ a kar né gə́ a gə la səm ḭ dara ree am m’aji ne, Loo gə́ njekula kəm ndòo ɔsm ɓɔḭ-ɓɔḭ lé, Ala a kula gə meemaji ləa gə ŋgonkoji ləa kam m’oo.

⁵ Ma m’to mbuna dəwje gə́ to d’asəna gə toboḭje bèe, Mbuna deḛ gə́ gaŋg dəwje mbidi-mbidi’g, Ŋgaŋ dee adə njel-njel to gə́ ndo̰ niŋga-ndəi əsé ndo̰ ɓandaŋg bèe ləm, Ndo̰ dee to asəna gə kiambas gə́ adə làm-làm bèe ləm tɔ.

⁶ Ǝi Ala, maji kari riba dɔ boo ləi gə́ ur dɔ dara’g ləm, Ar rɔnduba ləi taa dɔ naŋg nee pəl-pəl ləm tɔ.

⁷ Deḛ d’iya gum dɔ gɔlm’g Ar məəm ila ne kas bilim, Deḛ d’inja bwa nɔm’g Nɛ deḛ nja d’oso keneŋ.

⁸ Ǝi Ala, m’wa məəm kɔgərɔ, Ma m’wa məəm kɔgərɔ ya, M’a kɔs pa ləm, M’a kim nékimje ləm ləm tɔ.

⁹ Ka̰kəmrɔm, maji kari ḭ dɔ ɓi’g, Kṵdu-kag ləm, gə kṵdu-ko̰dè ləm lé ḭje dɔ ɓi’g tɔ. Ma lé m’a tuga lookàr gə tina ya.

¹⁰ Mbaidɔmbaije, m’a pidii mbuna koso-dəwje’g ləm, M’a kɔs pa kila ne riɓar dɔi’g no̰ ginkoji dəwje gə raŋg’g ləm tɔ,

¹¹ Mbata meemaji ləi aw njal teḛ mee dara’g ləm, Meenda londoŋ ləi dəs loo-kil-lə-ndi ləm tɔ.

¹² Ǝi Ala, maji kari riba dɔ boo ləi gə́ ur dɔ dara’g ləm, Maji kar rɔnduba ləi taa naŋg nee pəl-pəl ləm tɔ.