Pakɔsje 33 - Maktub gə́ To gə Kəmee

Pa pidi Ala gə́ Njekunda néje lai lé

¹ Seḭ njémeekarabasurje lé Maji kar sí alje rɔ sí gin Njesigənea̰’g! Pa pidi lé to wɔji dɔ njéra nédanaje ya.

² Maji kar sí pidije Njesigənea̰ gə kṵdu-kag ləm, Pideeje gə kṵdu-ko̰dè gə́ kulá dɔg ləm tɔ.

³ Maji kar sí ɔsje pa gə́ sigi areeje ya! Imje nékimje lə sí ləm, Ɔrje ndu sí gə́ tar ləm tɔ!

⁴ Mbata ta lə Njesigənea̰ lé To gə goo rəbee sur ləm, Kula reaje lai aw lé béréré Gə goo meenda ləa ləm tɔ.

⁵ Meekarabasur gə néra gə́ danasur lé Yeḛ unda dee dan kəmee’g, Meemaji lə Njesigənea̰ lé Taa dɔ naŋg nee yal-yal tɔ.

⁶ Ta gə́ teḛ ta Njesigənea̰’g lé Yeḛ unda ne dara ləm, Kṵji təa gə́ tó ne loo pu lé Yeḛ unda ne boo-néje gə́ mee dara’g ya ləm tɔ.

⁷ Baa-boo-kad lé Yeḛ daa manee dɔ na̰’d na̰’d ləm, Ɓul manje lé Yeḛ ŋgəm dee ɓuleeje’g ləm tɔ.

⁸ Maji kar naŋg nee lai-lai ɓəl Njesigənea̰! Dəwje lai gə́ d’isi keneŋ kara Maji kar dee ndəb pəd-pəd nea̰’g tɔ.

⁹ Mbata yeḛ pata ndá Née teḛ gə torndia ya ləm, Yeḛ un ndia ndá Née to keneŋ bèe ya ləm tɔ.

¹⁰ Néje gə́ ginkoji dəwje gə raŋg d’wɔji meḛ dee’g gə mba ra lé Njesigənea̰ wá telee wagəsa ləm, Néje gə́ koso-dəwje d’wɔji-kwɔji ra lé Yeḛ aree udu bo̰ ləm tɔ.

¹¹ Néje gə́ Njesigənea̰ wɔji mée’g gə mba ra lé To saar gə no̰ ləm, Néje gə́ yeḛ wɔji-kwɔji ra lé Yeḛ ra mbata lə njéboakojije lə na̰ gə goo na̰ goo na̰ ya ləm tɔ.

¹² Ginkoji dəwje gə́ Njesigənea̰ to Ala lə dee lé D’isi dan rɔlel’g ya, Koso-dəwje gə́ yeḛ ɔr dee unda dee gə kəmee gə́ nédɔji ləa lé Rɔ dee lel dee tɔ.

¹³ Njesigənea̰ lé si mee dara gə́ tar Aa loo oo ne dəwje lai.

¹⁴ Loo-siée gə́ tar nu lé Yeḛ tən ne dəwje lai gə́ d’isi dɔ naŋg nee.

¹⁵ Yeḛ nja to njekunda ɓəŋgərə deḛ lai, Yeḛ si gèŋ oo ne kula ra deeje lai ya.

¹⁶ Kudu boo-njérɔje ɓa d’askəm kaji mbai lé el ləm, Boo-siŋgamoŋ lé kara as kɔr bao-rɔ kilá tar el ləm tɔ.

¹⁷ Kunda lé siŋgá as mba kaji dəw el ləm, Siŋgamoŋ ləa kara askəm təa el ləm tɔ.

¹⁸ Aa ooje, kəm Njesigənea̰ lé To dɔ deḛ gə́ ɓəlee’g Gə́ d’unda meḛ dee yel dɔ meemaji’g ləa

¹⁹ Gə mba kɔr dee ne ta yoo’g ləm, Gə mba kar dee d’isi ne kəmba dan ɓoo-boo’g ləm tɔ.

²⁰ Jeḛ j’unda meḛ sí yel gə́ dɔ Njesigənea̰’g, Yeḛ lé to njela sə sí ləm, gə dər gel sí ləm tɔ.

²¹ Mbɔl dəa ɓa meḛ sí lel sí ne Mbata j’ɔm meḛ sí dɔ ria gə́ to gə kəmee ɓəd’g.

²² Njesigənea̰, maji kar noji ləi nai sə sí Mbata jeḛ j’unda meḛ sí yel gə́ dɔi-i’g ya.