Pakɔsje 29 - Maktub gə́ To gə Kəmee

Ndu Njesigənea̰ ɓa ɓar

1 Pakɔs lə Dabid

¹ Pakɔs lə Dabid Seḭ ŋgan-Alaje lé Maji kar sí ulaje rɔnduba dɔ Njesigənea̰’g ləm, Ilaje riɓar dəa’g ləm tɔ!

² Ulaje rɔnduba dɔ ri Njesigənea̰’g! Néje gə́ bə̰dərə bə̰ gə́ to gə kəmee doi lé Reeje ne undaje ne barmba nea̰’g wáje ne meḛ sí’g.

³ Ndu Njesigənea̰ ɓar dɔ manje’g pṵgum-pṵgum ləm, Ala gə́ njedo̰gɔr-ronduba ar ndi ndaŋg paḭ-paḭ ləm tɔ, Njesigənea̰ lé si dɔ baa-booje’g ya.

⁴ Ndu Njesigənea̰ ɓar gə siŋgamoŋ ləm, Ndu Njesigənea̰ ɓar gə boo-ronduba ləm tɔ.

⁵ Ndu Njesigənea̰ lé guru kag-sɛdrəje ləm, Kag-sɛdrəje gə́ Liba̰ kara Njesigənea̰ guru dee naŋg rug-rug ləm tɔ.

⁶ Kagje neelé yeḛ ar dee tal jagəra-jagəra asəna gə ŋgan maŋgje bèe ləm, Mbalje gə́ Liba̰ gə Sirio̰ kara yeḛ ar dee tal tur d’asəna gə kura dadɔgje bèe ya ləm tɔ.

⁷ Ndu Njesigənea̰ lé ar ndo̰ pərje teḛ bilim-bilim.

⁸ Ndu Njesigənea̰ lé ar dɔdilaloo yə ləm, Njesigənea̰ ar dɔdilaloo gə́ Kades kara yə ya ləm tɔ.

⁹ Ndu Njesigənea̰ lé ar arkasje d’oji ŋganje ləm, Ndia jagla mee kuuje jagla-jagla ləm tɔ. Néje lai gə́ to mee kəi-mbai’g ləa lé D’ila ndu dee naŋg wəl pana: Maji kula rɔnduba dəa’g ya.

¹⁰ Njesigənea̰ lé si dɔ kalimbai’g ləa Mee ndəa gə́ mán bélm taa ne loo lé ləm Njesigənea̰ si gə́ mbai dɔ kalimbai’g ləa O̰ ne ɓee saar-saar gə no̰ ya ləm tɔ.

¹¹ Njesigənea̰ lé ar dəwje ləa siŋga dee ləm, Njesigənea̰ lé tɔr ndia dɔ dəwje’g ləa Ar dee d’isi ne dan rɔlel’g ləm tɔ.