Pakɔsje 26 - Maktub gə́ To gə Kəmee

Ndukwɔi lə dəw gə́ ta wa dəa el

1 Pakɔs lə Dabid.

¹ Pakɔs lə Dabid. Njesigənea̰, maji kari gaŋgta ləm gə goo rəbee Mbata m’njaa gə goo rəw gə́ to gə dɔ najee. Ma m’ɔm məəm dɔ Njesigənea̰’g Bèe ndá m’a kunda ndolé nda̰ el.

² Njesigənea̰, maji kari ur məəm, Aḭ ne məəm oo ɓa, Maji kari naa məəm gə takə̰ji ləm To gə́ naa ne lar loo-kula-bṵda’g bèe tɔ.

³ Mbata meenoji ləi to raga ndəgəsə kəm’g ləm, Ma m’njaa dan kankəmta’g ləi ləm tɔ.

⁴ Ma m’ɔr kura gə njétaŋgɔmje el ləm, M’njaa gə njéhulaije el ləm tɔ.

⁵ Loo-kwa-dɔ-na̰ lə njéra némajelje lé Ma m’ə̰ji bəḭ-bəḭ ləm, M’isi na̰’d gə njémeeyèrje el ləm tɔ.

⁶ M’togo jim m’riba ne dɔ ta gə́ wa dɔm el lé, Ndá əi Njesigənea̰, yee ɓa m’njaa m’gugu ne dɔ loo-nékinjaməs ləi lé!

⁷ Mba kar ta rai oiyo nduba ne rəa tam’g ləm, Mba kɔr ne sor néraije gə́ maji dum ləm tɔ.

⁸ Njesigənea̰, kəi-sii gə́ i si keneŋ lé Ma m’unda dan kəm’g, To loo gə́ rɔnduba ləi to keneŋ.

⁹ Deḛ gə́ to njékaiyaje, gə deḛ gə́ d’ila məs lé Maji kari orəm sə dee na̰’d més el.

¹⁰ Mbata məs wa ji dee ləm, Nḛ́dogo-gel lé rusu jikɔl dee tub-tub ləm tɔ.

¹¹ Ma lé m’njaa gə goo néra gə́ gə dɔ najee, Bèe ndá maji kari ɔrm ne ji dee’g Oo ne kəm lootondoo’g ya kari.

¹² Gɔlm ŋgəŋ ŋgəŋ-ŋgəŋ dɔ rəw gə́ danasur’g. M’a kunda no̰ dɔkaisəgərə lə Njesigənea̰ loo-mbo̰-dɔ-na̰’g lə koso-dəwje lé ya.