Pakɔsje 24 - Maktub gə́ To gə Kəmee

Mbai gə́ njedo̰gɔr-ronduba

1 Pa lə Dabid

¹ Pa lə Dabid Naŋg neelé gə néje lai gə́ to keneŋ ləm, Dɔ naŋg neelé gə dəwje gə́ d’isi keneŋ ləm tɔ lé Deḛ to ka̰ Njesigənea̰ nja kára ba.

² Mbata yeḛ tum gin naŋg neelé dɔ mán bélm’g Aree ŋgəŋ ŋgəŋ-ŋgəŋ dɔ baa-booje’g ya.

³ See na̰ ɓa askəm tuga dɔ mbal lə Njesigənea̰ wa. Esé see na̰ ɓa a kḭ kaw saar teḛ ne loo ləa gə́ to gə kəmee lé wa.

⁴ Yeḛ gə́ jia àr ŋgad-ŋgad gə mée ndá londoŋ lé Yeḛ nja ɓa a kḭ kaw keneŋ, Yeḛ gə́ taŋgɔm tibi mbɔree el ləm, Yeḛ ubu rəa ər ne kəm loo el ləm tɔ.

⁵ Débee neelé Njesigənea̰ a tɔr ndia dəa’g ləm, Meekɔrjol lə Ala a kajee ləm tɔ.

⁶ Aa ooje, yee ɓa to nédɔji lə dəwje gə́ ɓar rii, Deḛ gə́ saŋg loo koo kəmi-i Ala lə Jakob ya.

⁷ Seḭ tarəwɓeeje lé Maji kar sí ɔrje dɔ sí gə́ tar, Seḭ tarəwɓeeje gə́ to gə no̰ lé Arje tarəwje to tar sab ya Gə mba kar mbai gə́ njedo̰gɔr-ronduba andə keneŋ!

⁸ See na̰ ɓa to mbai gə́ njedo̰gɔr-ronduba lé wa. Njesigənea̰ gə́ to njesiŋgamoŋ gə bao-rɔ ləm, Njesigənea̰ gə́ to njedumdɔloo loo-rɔ’g ləm tɔ lé Yeḛ nja ɓa gə́ mbai gə́ njedo̰gɔr-ronduba lé.

⁹ Seḭ tarəwɓeeje lé Maji kar sí ɔrje dɔ sí gə́ tar, Seḭ tarəwɓeeje gə́ to gə no̰ lé Arje tarəwje to tar sab ya Gə mba kar mbai gə́ njedo̰gɔr-ronduba andə keneŋ!

¹⁰ See na̰ ɓa to mbai gə́ njedo̰gɔr-ronduba lé wa. Njesigənea̰ gə́ njeboo-néje, Aa ooje, yeḛ nja ɓa to mbai gə́ njedo̰gɔr-ronduba lé ya.