Pakɔsje 21 - Maktub gə́ To gə Kəmee

Mbai gə́ askəm kɔm mée dɔ Njesigənea̰’g

¹ Pa lə Dabid gə́ ar bao-pa mba karee ɔs sə dee lé.

² Njesigənea̰, mbai lé al rəa mbata lə siŋgamoŋ’g ləi. Wai! La gə́ i la səa lé ar boo-rɔkal ləa al ne dɔ loo sula ya.

³ Né gə́ yeḛ ndiŋga lé i nja aree ləm, Né gə́ təa teḛ dəjii lé kara i ɔgee el ləm tɔ.

⁴ Mbata i wa dɔ gɔl nojimeendaje tɔr ne ndui dəa’g ləm, I ula dɔgugu larlɔr gə́ àr ŋgad-ŋgad dəa’g ya ləm tɔ.

⁵ Yeḛ dəjii kəmə mba si kəmba ndá I aree ya ləm, I aree si kəmba saar-saar gə no̰ ya ləm tɔ.

⁶ La gə́ i la səa lé ar rɔnduba ləa to ne yaa̰, I dolè gə riɓar gə boo-ronduba tɔ.

⁷ I aree to né tɔr ndu dɔ’g saar gə no̰ ləm, I dəaa gə rɔlel gə́ al dɔ loo sula nɔḭ’g ləm tɔ.

⁸ Mbai lé ɔm mée dɔ Njesigənea̰’g jəb-jəb, Mbɔl dɔ meemaji lə Njekurdɔloo’g lé Gɔlee unda ne ndolè nda̰ el.

⁹ Njéba̰je ləi lé i a kwa dee gə jii peb, Jikɔli kara a kiŋga deḛ lai gə́ d’ḛjii bəḭ-bəḭ tɔ.

¹⁰ I a kar dee tel to gə́ loo-kula-bṵda gə́ nuŋga kəd-kəd Mee ndəa gə́ i a teḛ kəm dee’g wai. Njesigənea̰ a kar dee d’udu guduru dan oŋg’d ləa ndá Pər a roo dee dula-dula.

¹¹ I a kar ginkadɔg deeje sané pá dɔ naŋg nee ləm, Ginkoji dee kara a kudu bo̰ mbuna dəwje’g ləm tɔ.

¹² Deḛ lé d’wɔji-kwɔji ra səi majel, Deḛ d’ə̰ji néje gə́ majel meḛ dee’g gə mba ra to Nɛ siŋga dee a godo.

¹³ Mbata i a kar dee tel gir dee d’aḭ ləm, I a rɔ dee gə ɓandaŋg ləi ləm tɔ.

¹⁴ Njesigənea̰, maji kari ḭta tɔji dee boo-siŋgamoŋ ləi! Jeḛ ndigi kɔs pa kila ne riɓar dɔ siŋgamoŋ’g ləi ya.