Pakɔsje 17 - Maktub gə́ To gə Kəmee

Njegelgodo ɓar Njesigənea̰

1 Tamaji lə Dabid

¹ Tamaji lə Dabid Ǝi Njesigənea̰, maji kari ur mbii oo ne ndukwɔi ləm gə́ to danasur, Oré mbii ndəŋ dɔ ndu no̰je’g ləm ləm, Ur mbii gèŋ oo ne ta gə́ m’to ne tai’g Gə́ m’ra gə tam m’su ne kəm loo ɓa el ləm tɔ.

² Maji kar meekarabasur ləm teḛ to raga ndəgəsə nɔḭ’g Gə mba kar kəmi oo ne néram gə́ to gə dɔ najee lé.

³ Ɓó lé i naa meekuru ləm Esé tən néram loondul’g, Ɓó lé i aḭ məəm ndá I a kiŋga né gə́ raŋg kára keneŋ el, Takə̰ji ləm tɔ ɓəd gə ta gə́ teḛ tam’g el tɔ.

⁴ Loo gə́ ma m’oo néra dəwje Gə́ to majikojije dɔ ta gə́ teḛ tai’g ndá M’ɔg rɔm dɔ rəw-kaw njéra né kərm-kərmje’g.

⁵ Gɔlm ŋgəŋ ŋgəŋ-ŋgəŋ dɔ kila rəwje’g ləi ləm, Gɔlm unda ndolè nda̰ el ləm tɔ.

⁶ Ǝi Ala, ma lé m’ɓar rii mbata i oo ndum, Maji kari ur mbii gə́ rɔm’g oo ne ta ləm.

⁷ Maji kari nduba meemaji ləi gə́ raga, I gə́ njekaji deḛ gə́ saŋg njo̰loo-kula-dɔ dee rɔi’g lé ləm, I gə́ ɔr dee ji njéba̰je’g lə dee gə jii gə́ ɓar mèr-mèr lé ləm tɔ.

⁸ Maji kari tɔs kəmi dɔm’g asəna gə ŋgonkəmi ləm, Maji kari iyam kɔrɔg gel bagi’g lé ləm tɔ.

⁹ Ajim ne ji njémeeyèrje gə́ d’ula kəm ndòo ləm, Gə ji njéba̰je ləm gə́ gugu dɔm sub d’aw ne səm rèm-rèm ləm tɔ.

¹⁰ Deḛ d’oo kəm lootondoo’g el ləm, Kesta ɓa rusu ta dee tub-tub ləm tɔ.

¹¹ Deḛ lé d’un dɔ gɔl sí d’aḭ dɔ sí sub ləm, Deḛ d’um sí gə mba tuba sí naŋg mbajila-mbajila ləm tɔ

¹² Asəna gə toboḭ gə́ mal gaŋg nékwa tiée mbidi-mbidi rəa ləm, Asəna gə ŋgon toboḭ gə́ si ŋgəḭ né naŋg loo-kum’g ləa bèe ləm tɔ.

¹³ Njesigənea̰, maji kari ḭta tila kəmee Mba kɔsee kilá ya! Un kiambas ləi ɔrm ne ji njemeeyèr’g lé!

¹⁴ Njesigənea̰, maji kari ɔrm ji dəwje gə́ dɔ naŋg nee gə jii gə́ ɓar mèr-mèr. Nédɔji lə dee to naŋg nee ləm, I ar meḛ dee ndan gə némajije ləi ləm tɔ, Ŋgan deeje kara meḛ dee ndan tub-tub Ar dee d’ya̰ ges néje lə dee gə́ uru kugu lé mbata lə ŋgaka deeje lé tɔ.

¹⁵ Ma lé mbɔl dɔ meekarabasur ləm lé ɓa M’a koo ne kəmi ya, Loo gə́ m’a teḛ kəm gə ndɔ rad lé ndá Ndili ɓa kəm a kwəi dəa’g sḭ ləm, a tuga ne sib ləm tɔ.