Pakɔsje 15 - Maktub gə́ To gə Kəmee

Né gə́ Njesigənea̰ aw ndée rɔ majikojije’g ləa

1 Pa lə Dabid

¹ Pa lə Dabid Ǝi Njesigənea̰! See na̰ ɓa askəm si mee kəi-kubu’g ləi gə kuree waga wa. See na̰ ɓa askəm ra ɓee dɔ mbal’g ləi gə́ to gə kəmee lé wa.

² Yeḛ gə́ njaa rəw néra gə́ danasur’g ləm, Gə ra né gə́ gə dɔ najee ləma, Gə pata gə goo kankəmta gə́ to mée’g ləm tɔ ɓa.

³ Yeḛ gaŋgta unda ta maree’g el ləm, Ra majel gə maree el ləma, Ila rɔkul dɔ njeboatakəi’g ləa el ləm tɔ.

⁴ Dəw gə́ to kḛji lé Yeḛ ée gə kəm dɔbee, Nɛ deḛ gə́ ɓəl Njesigənea̰ lé ɓa Yeḛ ila riɓar dɔ dee’g. Loo gə́ yeḛ un ndia gə rɔkubu ɓa kədərə səa kara Yeḛ pa njaŋg ɓó yeḛ tel gə ndia gogo el.

⁵ Lé yeḛ ar dee toná lar ndá kara Yeḛ taa manee dɔ’g el ləm, Ɓó lé deḛ ndo̰ təa gə lar mba kila ne ta dɔ yeḛ gə́ ta wa dəa el kara Yeḛ taa el ləm tɔ. Dəw gə́ ra togə́bè ndá a kunda ndolé nda̰ el.