Pakɔsje 143 - Maktub gə́ To gə Kəmee

Njesigənea̰ maji kari aw səa loo-gaŋg-rəwta’g el

1 Pakɔs lə Dabid.

¹ Pakɔs lə Dabid. Njesigənea̰, maji kari oo tamaji ləm, Ur mbii gèŋ oo ne ndòo raje ləm! Maji kari ilam keneŋ am né gə́ m’aw ndée Gə goo meenda londoŋ ləi ləm, Gə goo néra gə dɔ najee ləi ləm tɔ.

² Maji kari aw gə kura ləi lé loo-gaŋg-rəwta’g el Mbata dəw gə́ si kəmba gə́ njemeekarabasur nɔḭ’g bèe kára kara godo.

³ Njeba̰ lé kɔrəm ləm, Yeḛ mboiyim naŋg mbajila-mbajila ləma, Yeḛ am m’isi dan loondul’g Asəna gə dəwje gə́ d’wəi ləw ba bèe lé ləm tɔ.

⁴ Ndiləm unda bala tigi-tigi ləm, Meem to kəgəgə ya ləm tɔ.

⁵ M’ar məəm olé teḛ dɔ ndɔje gə́ kédé gə́ ləw lé ləm, M’la̰ji dɔ néraje’g ləi lai ləma, M’ə̰ji m’teḛ dɔ néje lai gə́ i ra gə jii ya ləm tɔ.

⁶ M’odo jim m’ula ndiŋ gə́ rɔi’g ya ləm, Ŋgaw məəm əmə biriri-biriri gooi’g Asəna gə dɔ naŋg gə́ tudu kurum-kurum Gə́ ndiŋga mán keneŋ bèe ləm tɔ.

⁷ Ǝi Njesigənea̰, maji kari ɔs rɔi ɓad Gə mba kam né gə́ ma m’dəjii lé! Meem ila kas bilim. Maji kari o̰ kəmi səm el. Ɓó lé bèe el ndá m’a tel to asəna gə deḛ gə́ d’ɔm dee bwa-dɔɓar’g bèe.

⁸ Un kudee teḛ gə ndɔ rad ya ndá Am m’oo meemaji ləi Mbata ma lé m’ɔm məəm dɔi’g ya. Ar kəm inja dɔ rəw gə́ kəm njaa keneŋ lé Mbata ma lé m’tel kəm par gə́ rɔi’g ya.

⁹ Ǝi Njesigənea̰, maji kari ɔrm ji njéba̰je’g ləm ya, Mbata ma lé loo gə́ mbɔri’g ɓa M’saŋg njo̰loo-kula-dɔ ləm keneŋ ya.

¹⁰ Maji kari ndoom gə mba karm m’ra né gə́ məəi wɔji ɓa, Mbata i lé to Ala ləm. Maji kar ndili onm gə́ rəw gə́ danasur’g ya.

¹¹ Njesigənea̰, maji kari am m’isi kəmba gə mba kar rii ɓar ne, Ɔrm dan néurti’g gə goo néra gə́ gə dɔ najee ləi lé.

¹² Gə goo meemaji ləi lé Ar njéba̰je ləm d’udu guduru, Ar deḛ lai gə́ to njekorè dɔm naŋgje kara d’wəi ne mburug to Mbata ma lé m’to gə́ kura ləi ya.