Pakɔsje 140 - Maktub gə́ To gə Kəmee

Tamaji kar Njesigənea̰ aa ne dəa kər-kər

¹ Pakɔs lə Dabid gə́ bao-pa ɔs sə dee lé

² Njesigənea̰, maji kari ɔrm ji dəwje gə́ to gə́ njémeeyèrje ləm, Aa dɔm kər-kər mbata lə njéra né kərm-kərmje ləm tɔ.

³ Deḛ la̰ji tor néra gə́ majel meḛ dee’g ləm, D’isi ne dɔ gɔl dee’g kəgəgə gə mba kḭ rɔ ne ləm tɔ.

⁴ Deḛ lé d’ɔl ndo̰ dee to gə́ li bèe ləm, Gel ndo̰ dee to asəna gə mas pir ləm tɔ.

⁵ Njesigənea̰, maji kari am m’oso ji njémeeyèrje’g el ləm, Aa dɔm kər-kər mbata lə njéra né kərm-kərmje Gə́ d’wɔji-kwɔji kam m’oso lé ləm tɔ.

⁶ Njébeeleje d’iya gum gə d’ila ba̰də mbata ləm ləm, Deḛ tɔ jám gə kaar rəw-rəw njal d’ɔr ləma, Deḛ d’umum rəw ləm tɔ.

⁷ Ma m’ula Njesigənea̰ lé m’pana: I lé to Ala ləm ya. Njesigənea̰, maji kari ur mbii oo ne ndum Gə́ m’ra ne ndòo rɔi’g.

⁸ Njesigənea̰, Mbaidɔmbaije, I gə́ to njeroŋgəŋ ləm, gə njekajim lé I nja o̰ dɔm ndɔ rɔ’g lé ya.

⁹ Njesigənea̰, né gə́ njemeeyèr ndiŋga lé Maji kari aree aw lée’g béréré el ləm, Néje ləa gə́ yeḛ wɔji-kwɔji ra lé Maji kari ya̰ aree ra el ləm tɔ Nà a kḭ ti ne rəa dɔ’g.

¹⁰ Deḛ gə́ d’aḭ dɔm sub lé Maji kar ta néra kori-kori gə́ teḛ ta dee’g lé Tel oso dɔ dee-deḛ’g ya.

¹¹ Maji kar kɔr pər gə́ taa pər gəgəgə ya ɓugu dɔ dee’g wɔlɔg ləm, Maji karee ɓugu dee dan pər’g Gə dan bwa-wəlje gə́ d’a kḭ keneŋ teḛ raga gogo el ləm tɔ.

¹² Dəw gə́ ndəa̰ pa taŋgɔm lé Maa̰ gɔlee dɔ naŋg nee el ləm, Dəw gə́ njera né kərm-kərm kara Meeko̰ aw səa aree tuji ne ləm tɔ.

¹³ Ma m’gər gao, Njesigənea̰ gaŋg rəwta lə njénékəmndooje gə goo rəbee ləm, Deḛ gə́ to njéndooje kara Yeḛ ɔr kəm ta lə dee gə dɔ najee ləm tɔ.

¹⁴ Oiyo, deḛ gə́ meḛ dee kára ba sur lé D’a kar rii ɓar ləm, Dəwje gə́ njéra nédanaje lé kara D’a ra ɓee nɔḭ’g ya ləm tɔ.