Pakɔsje 14 - Maktub gə́ To gə Kəmee

Meeyèr lə dəw gə́ gər Ala el

1 Pa lə Dabid gə́ ar bao-pa mba karee ɔs sə dee lé .

¹ Pa lə Dabid gə́ ar bao-pa mba karee ɔs sə dee lé. Mbə-dəw lé pa mée’g pana: Ala godo ya. Deḛ tel to d’asəna gə né gə́ ndum ləm, Deḛ ra néje gə́ yèr gə́ to kḛji ləm tɔ, Yeḛ gə́ njera maji gə́ kára bèe kara godo.

² Njesigənea̰ gə́ si dɔ dara gə́ tar lé Aa loo oo dəwje Mba koo see dəw kára gə́ to gə́ njekəmkàr Gə́ saŋg Ala si gən wa.

³ Deḛ lai ndəm d’ila rima-rima, Dəw kára gə́ njera maji gə́ kára bèe kara godo, Kára bèe ya kara godo.

⁴ Deḛ lai gə́ ra néje gə́ yèr lé See deḛ gər rəbee el wa. Deḛ gaŋg dəwje ləm mbidi-mbidi D’ar dee to gə́ nésɔ lə dee, Deḛ ɓar ri Njesigənea̰ bèe el.

⁵ Gelee gə́ nee ɓa d’a kunda bala ndəb ne pəd-pəd Loo gə́ Ala a kunda loo teḛ wai Mbuna ginkoji dəwje gə́ njéra nédanaje’g.

⁶ Seḭ ɔmje rɔkul dɔ né gə́ njenékəmndoo wɔji mée’g gə mba ra Mbata Njesigənea̰ lé to gə́ njo̰loo-kula-dɔ ləa ya.

⁷ Wai! See na̰ ɓa a kḭ Sio̰ gə mba taa dɔ Israɛlje wa. Ndɔ gə́ Njesigənea̰ a tel gə dəwje ləa gə́ d’wa dee ɓər lé Ndá Jakob a kal rəa ləm, Israɛlje kara d’a si dan rɔlel’g ləm tɔ.