Pakɔsje 139 - Maktub gə́ To gə Kəmee

Pa kila riɓar dɔ Njegər-néje-lai’g

1 Pakɔs lə Dabid gə́ bao-pa ɔs sə dee lé.

¹ Pakɔs lə Dabid gə́ bao-pa ɔs sə dee lé. Njesigənea̰, i nja naa meekuru ləm, i gərm gao.

² I oo loo kisi naŋg ləm ləm, gə loo kḭ tar ləm ləm tɔ, Takə̰ji ləm gə́ nai əw ɓəi lé i oo gao ya.

³ I oo loo gə́ m’njaa tar ləm, gə loo gə́ m’to naŋg ləm tɔ, Néje lai gə́ m’ra lé i gər gao ya.

⁴ Mbata ta teḛ tam’g el ɓəi, Nɛ i Njesigənea̰ nja gər taje lai gə́ a gə teḛ tam’g yal mba̰.

⁵ I aḭ dɔm sub-sub gogo ləm, kédé ləma, I ila jii dɔm’g ləm tɔ.

⁶ Gosɔnégər gə́ maji dum gə́ togə́bè lé al dɔm sula, Dum dɔm ɓó m’askəm gər ginee el.

⁷ See loo gə́ ra ɓa m’a kaw əw keneŋ Lal kar ndili oom wa. See loo gə́ ra ɓa m’a kaḭ-i kaw əw, Lal kar kəmi oso dɔm’g keneŋ wa.

⁸ Ɓó lé m’a kḭ kaw mee dara’g ndá I si keneŋ gən ya, Ɓó lé m’a to mbuna njé gə́ d’wəi’g kara I si gən ya tɔ.

⁹ Ɓó lé m’askəm kuba bag loo-gə́-si-àr gə́ kunda Mba kaw njal si ŋgaŋ baa-boo-kad’g kara

¹⁰ Lée neelé jii a kɔnm ləm, Jikɔli a kwam kérég ləm tɔ.

¹¹ Ɓó lé m’pana: Loondul gə́ ndul njudu-njudu ɓa a dəb dɔm’g ko̰ dɔm ndá Loondul lé tel to lookàr dɔm’g.

¹² Loo gə́ ndul njudu-njudu lé kara ndul pii kəmi’g el, Loondul lé àr kəmi’g njai-njai asəna gə lookàr bèe, Loo gə́ ndul njudu-njudu lé ndogó jol-jol kəmi’g ya tɔ.

¹³ I nja to njekuba ɓərm ləm, Gə njetɔs darɔm ta na̰’d mee kɔmje’g ləm tɔ.

¹⁴ Ma m’pidii mbata m’to dəw-kunda ləi gə́ maji dum. Kula raije lé maji péd-péd ya, Yee ɓa ma m’gər gao ya.

¹⁵ Loo gə́ i undam loo-kiya’g ɓəi Ar barkəmrɔmje d’alé d’iŋga na̰ mee loo kuru gə́ lə naŋg lé ndá Rɔm oo loo-kiya-rəa kəmi’g pai godo.

¹⁶ Loo gə́ m’nai dan məskèm’g ɓəi ndá Kəmi oom ya, Ndɔ simje lai lé i tura ɗém-ɗém Ndaŋ dee ne mee maktub’g ləi mba̰ ɓa Ma m’isi ne kəmba ɓəi.

¹⁷ Ǝi Ala, takə̰ji ləi gə́ wɔji dɔm lé al dɔ loo sula! Takə̰ji ləi lé kanee bula yaa̰ dum tura ya!

¹⁸ Lée m’to gə́ njetura dee kara Deḛ bula d’unda nagəra. M’ndel dɔ ɓi’g nɛ m’nai səi ya ɓəi.

¹⁹ Ǝi Ala, maji kari ar njémeeyèrje d’udu bo̰! Seḭ diŋgamje gə́ njékilaməsje lé Maji kar sí saaje rɔ sí rɔm’d gə́ raŋg.

²⁰ Deḛ pata meeyèr d’ula ne sul dɔi’g ləm, Njéba̰je ləi lé d’un rii d’o̰ ne dɔ taŋgɔm lə dee ləm tɔ.

²¹ Njesigənea̰, deḛ gə́ d’wai gə meḛ dee lé See m’a kwa dee gə məəm to el wa. Deḛ gə́ d’ḭ səi lé See m’a koo dee gə kəm dɔbee el wa.

²² Oiyo, ma m’wa dee gə məəm gə́ kwa gə mee gə́ gəd-gəd ya, M’oo dee gə́ njéba̰je ləm ya tɔ.

²³ Ǝi Ala, maji kari ur məəm gə mba gər məəm ləm, Aḭ məəm gə mba gər takə̰jije ləm ləm tɔ.

²⁴ Aa loo oo ɓó lé m’aw rəw gə́ majel’g ndá Ɔr nɔm dan rəw gə́ to gə no̰’g.