Pakɔsje 136 - Maktub gə́ To gə Kəmee

Meekɔr jol-jol gə́ to gə no̰

¹ Maji kar sí pidije Njesigənea̰ Mbata yeḛ lé maji dum, Mbata meekɔrjol ləa lé to saar-saar gə no̰.

² Pidije Ala gə́ to njekur dɔ magəje’g lai lé Mbata meekɔrjol ləa lé to saar-saar gə no̰.

³ Pidije Mbaidɔmbaije gə́ to njekur dɔ mbaije’g lai, Mbata meekɔrjol ləa lé to saar-saar gə no̰.

⁴ Yeḛ nja kára ba ra nédumkooje gə́ d’al dɔ loo sula Mbata meekɔrjol ləa lé to saar-saar gə no̰.

⁵ Yeḛ gə́ to njera dara gə goo gosonégər lé Mbata meekɔrjol ləa lé to saar-saar gə no̰.

⁶ Yeḛ gə́ to njeyal naŋg dɔ manje’g lé Mbata meekɔrjol ləa lé to saar-saar gə no̰

⁷ Yeḛ gə́ to njera néndogóje gə́ boo-boo lé Mbata meekɔrjol ləa lé to saar-saar gə no̰.

⁸ Kàr gə mba karee o̰ ɓee dɔ lookàr’g lé Mbata meekɔrjol ləa lé to saar-saar gə no̰.

⁹ Gə naḭ gə kéréméje gə mba kar dee d’o̰ ɓee dɔ loondul’g lé Mbata meekɔrjol ləa lé to saar-saar gə no̰.

¹⁰ Yeḛ gə́ to njekunda ŋgandər njé Gə́ Ejiptə’g vaga-vaga tɔl dee lé Mbata meekɔrjol ləa lé to saar-saar gə no̰.

¹¹ Yeḛ ar Israɛlje d’unda loo mbuna dee’g teḛ Mbata meekɔrjol ləa lé to saar-saar gə no̰.

¹² Gə goo ji siŋgamoŋ ləa gə́ ɓar mèr-mèr ləm, Gə kag jia gə́ yeḛ ula ndiŋ ləm tɔ lé Mbata meekɔrjol ləa lé to saar-saar gə no̰.

¹³ Yeḛ gə́ to njekunda baa-boo gə́ ria lə Baa-Kas gaŋg dana loo joo lé Mbata meekɔrjol ləa lé to saar-saar gə no̰.

¹⁴ Ar Israɛlje dəs mbuna’g dana lé Mbata meekɔrjol ləa lé to saar-saar gə no̰.

¹⁵ Ar Parao̰ gə njérɔje ləa ɓugu ne dan baa-boo gə́ ria lə Baa-Kas’g neelé wɔlɔg ya, Mbata meekɔrjol ləa lé to saar-saar gə no̰.

¹⁶ Yeḛ nja ɔr no̰ koso-dəwje ləa dɔdilaloo’g lé Mbata meekɔrjol ləa lé to saar-saar gə no̰.

¹⁷ Mbaije gə́ boo-boo lé yeḛ kunda dee Mbata meekɔrjol ləa lé to saar-saar gə no̰.

¹⁸ Mbaije gə́ to njésiŋgamoŋje lé yeḛ tɔl dee Mbata meekɔrjol ləa lé to saar-saar gə no̰.

¹⁹ Siho̰ gə́ to mbai lə Amɔrje lé Mbata meekɔrjol ləa lé to saar-saar gə no̰.

²⁰ Gə Ɔg mbai gə́ Basan lé Mbata meekɔrjol ləa lé to saar-saar gə no̰.

²¹ Ar ɓee lə dee to nénduba ya Mbata meekɔrjol ləa lé to saar-saar gə no̰.

²² To nénduba lə Israɛlje gə́ to kuraje ləa Mbata meekɔrjol ləa lé to saar-saar gə no̰.

²³ Yeḛ ar mée olé teḛ dɔ sí’g loo gə́ d’ula sul dɔ sí’g Mbata meekɔrjol ləa lé to saar-saar gə no̰.

²⁴ Yeḛ ɔr sí ji njékula kəm sí ndooje’g Mbata meekɔrjol ləa lé to saar-saar gə no̰.

²⁵ Néje lai gə́ d’aw kəmba lé Yeḛ nja ar dee nésɔ dee Mbata meekɔrjol ləa lé to saar-saar gə no̰.

²⁶ Pidije Ala gə́ to mbai dɔ dara lé Mbata meekɔrjol ləa lé to saar-saar gə no̰.