Pakɔsje 135 - Maktub gə́ To gə Kəmee

Pa kula rɔnduba dɔ Ala gə́ Njesikəmba’g

¹ Maji kar sí pidije Njesigənea̰. Pidije ri Njesigənea̰ lé Seḭ kuraje lə Njesigənea̰ lé pideeje,

² Seḭ gə́ aarje mee kəi’g lə Njesigənea̰ Gə́ aarje gadlooje’g takəi’g lə Ala lə sí lé!

³ Maji kar sí pidije Njesigənea̰ Mbata Njesigənea̰ lé to njemeemaji, Ɔsje pa arje ria ɓar ne Mbata yeḛ to njekwa sí gə́ rəa’g.

⁴ Mbata Njesigənea̰ lé nja ɓa mbər Jakob ləm, Ar Israɛl to gə́ kea̰ nja doŋgɔ doi ləm tɔ.

⁵ Ma m’gər gao Njesigənea̰ lé to gə́ boo, Mbaidɔmbaije lə sí lé ur dɔ magəje’g lai ya.

⁶ Néje lai gə́ Njesigənea̰ ndigi lé ndá yeḛ ra ya, Néje gə́ mee dara’g gə dɔ naŋg nee ləm, Dan baa-boo-kadje’g gə dan ɓul manje’g lé ləm tɔ.

⁷ Yeḛ ar kil-lə ndi ḭ gwɔi naŋg’g aw tar ləm, Yeḛ ar ndi tel gə ndi ər ləma, Yeḛ ɔr lel dan nébaoje’g ləa aree ula ləm tɔ.

⁸ Yeḛ kunda ŋgandər njé gə́ Ejiptə vaga-vaga tɔl dee Un kudee dɔ dəwje’g teḛ ne dɔ nékulje’g ya tɔ.

⁹ Yeḛ ula gə nétɔjije Gə nékɔbje mbuna njé gə́ Ejiptə’g Koma̰ ne Parao̰ gə kuraje ləa lai.

¹⁰ Yeḛ kunda ginkoji dəwje gə raŋg bula ləm, Yeḛ tɔl mbaije gə́ to njésiŋgamoŋje ləm tɔ:

¹¹ Siho̰, mbai gə́ ɓee lə Amɔrje ləm, Gə Ɔg, mbai gə́ ɓee lə Basanje ləma, Gə mbaije lai gə́ Kana̰ lé ləm tɔ.

¹² Yeḛ ar ɓeeje lə dee to gə́ nénduba To nénduba lə Israɛlje gə́ to koso-dəwje ləa lé.

¹³ Njesigənea̰, rii lé to saar-saar gə no̰, Njesigənea̰, meḛ ginka dəwje-dəwje lé olé dɔi’d gə́ kédé-kédé ya.

¹⁴ Mbata Njesigənea̰ a gaŋgta dɔ koso-dəwje’g ləa lé ləm, Yeḛ a koo kəmtondoo lə kuraje ləa ya ləm tɔ.

¹⁵ Magəpoleje lə ginkoji dəwje gə raŋg lé To néje gə́ ra gə larnda gə larlɔr ləm, To néje gə́ dəwje ɓa ra gə ji dee-deḛ ya ləm tɔ.

¹⁶ Ta dee to keneŋ ya Nɛ dee pa ne ta el ləm, Kəm dee to keneŋ ya Nɛ d’oo ne loo el ləm,

¹⁷ Mbi dee to keneŋ ya Nɛ d’oo ne ta el ləma, Kəmə gə́ bèe ya kara Teḛ ta dee’g el ləm tɔ.

¹⁸ Deḛ gə́ njéra deeje ləm, Gə deḛ lai gə́ d’ɔm meḛ dee dɔ dee’g ləm tɔ lé To tana sə dee pai-pai ya.

¹⁹ Seḭ ginkoji Israɛlje lé Undaje no̰ dɔkaisəgərə lə Njesigənea̰, Seḭ ŋgaka Aaro̰ lé Undaje no̰ dɔkaisəgərə lə Njesigənea̰ ya.

²⁰ Seḭ gel-bɔje lə Ləbi lé Undaje no̰ dɔkaisəgərə lə Njesigənea̰ lé. Seḭ gə́ ɓəlje Njesigənea̰ lé Undaje no̰ dɔkaisəgərə lə Njesigənea̰ ya tɔ.

²¹ Maji kar njé gə́ Sio̰ Gə deḛ gə́ d’isi Jerusalem lé D’unda no̰ dɔkaisəgərə lə Njesigənea̰. Pidije Njesigənea̰ ya.