Pakɔsje 130 - Maktub gə́ To gə Kəmee

Tamaji gə́ ra dan néurti’g

1 Pakɔs kḭ kaw tuga ne loo ɗao-ɗao gə́ tar.

¹ Pakɔs kḭ kaw tuga ne loo ɗao-ɗao gə́ tar. Ǝi Njesigənea̰, dan néurti gə́ al dɔm sula’g lé ɓa M’no̰ m’ɓar ne rii ya.

² Mbaidɔmbaije, maji kari oo ndum ya kari, Maji kari ur mbii gèŋ gə mba koo ne ndòo ra gə́ m’ra rɔi’g lé.

³ Njesigənea̰, ɓó lé i ar məəi olé dɔ néra kori-korije’g lə dəwje ndá Mbaidɔmbaije, see na̰ ɓa a si kəmba ɓəi wa.

⁴ Nɛ i nja loo kiŋga meekoso lemsé to mbɔri’g Gə mba kar dəwje ɓəli ne.

⁵ M’unda məəm yel gə́ dɔ Njesigənea̰’g ləm, M’unda məəm yel dəa’g gə ŋgaw məəm bura ləm tɔ, Ndá m’ŋgina ne ndukun ləa lé.

⁶ Ŋgaw məəm ndiŋga Mbaidɔmbaije Unda njéŋgəmlooje gə́ ndiŋga lookàr lé bèe, Unda njéŋgəmlooje gə́ ndiŋga lookàr ya.

⁷ Seḭ Israɛlje, maji kar sí undaje meḛ sí yel gə́ dɔ Njesigənea̰’g ya. Mbata meekoso lemsé to gə́ rɔ Njesigənea̰’g ləm, Nékoga dɔ dəwje taa rəa pəl-pəl ləm tɔ.

⁸ Yeḛ nja ɓa a kuga dɔ Israɛlje lé Kɔr néra gə́ kori-korije lə deḛ lai dɔ dee’g ya.