Pakɔsje 13 - Maktub gə́ To gə Kəmee

See mee Ala a kwəi dɔ neḛ’g saar ndɔ gə́ ra wa

¹ Pa lə Dabid gə́ ar bao-pa mba karee ɔs sə dee lé.

² Njesigənea̰, see saar ndɔ gə́ ra ɓa i a kar məəi wəi dɔm’g wa. See i a ko̰ kəmi səm saar ndɔ ka̰da wa.

³ See məəm a pélé wəs-wəs saar ndɔ gə́ ra wa. See m’a si gə məəm gə́ ndul saar ndɔ ka̰da wa. See njeba̰ ləm a kḭ koma̰ səm saar ndɔ gə́ ra wa.

⁴ Njesigənea̰, Ala ləm, Maji kari aa loo oo ndá tel ilam keneŋ ya. Ar kəm to jəgəgə Mba kam m’toɓi gə́ wɔji dɔ yoo lé el ləm,

⁵ Mba kar njeba̰ ləm ḭ pana: Neḛ n’dum dɔm mba̰ bèe el ləma, Mba kar njékoma̰ səmje lé d’al rɔ dee Loo gə́ m’unda ndolè lé el ləm tɔ.

⁶ Ma lé m’ɔm məəm dɔ meemaji’g ləi, Boo-rɔlel kara taa məəm pəl-pəl Mbata kaji ləi gə́ i ajim ne lé ya tɔ. M’ɔs pa m’ar Njesigənea̰ Mbata yeḛ ra səm maji.