Pakɔsje 121 - Maktub gə́ To gə Kəmee

Njesigənea̰ to njekaa dɔ Israɛlje

1 Pakɔs kḭ kaw tuga ne loo ɗao-ɗao gə́ tar.

¹ Pakɔs kḭ kaw tuga ne loo ɗao-ɗao gə́ tar. M’un kəm m’ila dɔ mbalje’g, See né gə́ a la səm a kḭ ra wa.

² Né gə́ la səm lé ḭ rɔ Njesigənea̰’g, Yeḛ nja ɓa unda dara gə naŋg nee.

³ Yeḛ a kya̰ loo kar gɔli unda ndolè el. Yeḛ gə́ njekaa dɔi lé ɓi a kwa kəmee nda̰ el.

⁴ Aa ooje, yeḛ gə́ njekaa dɔ Israɛlje lé Ɓi wa kəmee el ləm, yeḛ toɓi el ləm tɔ.

⁵ Njesigənea̰ lé to njekaa dɔi ya ləm, Njesigənea̰ to ndil gə́ aar dɔ jikɔli’g o̰ dɔi ləm tɔ.

⁶ Kàr a kɔsi dan kàr gə́ nuŋga kəd-kəd’g el ləm, Naḭ a rai loondul’g el ləm tɔ.

⁷ Njesigənea̰ a kaḭ bada dɔi’g kar né gə́ majel tibi mbɔri el, Yeḛ a kaḭ bada dɔi’g ya.

⁸ Njesigənea̰ a kaa dɔi loo-kabi’g ləm, gə loo-teli’g ləm tɔ, Un kudee ɓasinè saar gə no̰.