Pakɔsje 113 - Maktub gə́ To gə Kəmee

Ala ra meemaji gə njéndooje

¹ Pidije Njesigənea̰. Seḭ kuraje lə Njesigənea̰, pideeje, Pidije ri Njesigənea̰.

² Maji kar dɔ ri Njesigənea̰ ai səgərə Un kudee ɓasinè saar-saar gə no̰ ya!

³ Un kudee loo-kuba’g lə kàr Saar teḛ loo-kuru-naŋg’d ləa lé Maji kar dee d’ila riɓar dɔ ri Njesigənea̰’g.

⁴ Njesigənea̰ lé ur dɔ ginkoji dəwje gə raŋg’g lai ləm, Rɔnduba ləa kara dum dɔ dara ya ləm tɔ.

⁵ See na̰ ɓa tana gə Njesigənea̰, Ala lə sí lé wa. Yeḛ lé loo-siée to tar sab.

⁶ Yeḛ aa loo gərərə Oo ne néje mee dara’g gə dɔ naŋg nee.

⁷ Yeḛ wa njendoo ɔree dan babur’g ləm, Yeḛ wa dəw gə́ daŋ’d lé ɔree ɓiri-ɓisi’g ləm tɔ

⁸ Gə mba kar dee d’isi na̰’d gə dəwje gə́ boo Deḛ gə́ to mbaije mbuna koso-dəwje’g ləa.

⁹ Yeḛ gə́ to gə́ kawkad lé Yeḛ nja aree kəi-siée ləm, Yeḛ aree to ko̰ ŋganje gə́ njerɔlel Mbuna ŋganeeje’g ləm tɔ. Pidije Njesigənea̰ ya.