Pakɔsje 11 - Maktub gə́ To gə Kəmee

Njesigənea̰ to njo̰loo lə njéra nédanaje

1 Pa lə Dabid gə́ ar bao-pa mba karee ɔs sə dee lé.

¹ Pa lə Dabid gə́ ar bao-pa mba karee ɔs sə dee lé. Ma lé njo̰loo-kula-dɔm to rɔ Njesigənea̰’g ya, Ŋga see gelee ban ɓa seḭ ulamje pajena: Maji kam m’aḭ gə́ dɔ mbalje’g lé to gə́ yel bèe wa.

² Mbata aa ooje, njémeeyèrje lé Kə ɓandaŋgje lə dee mber-mber ləm, D’unda kandə ɓandaŋg lə dee dɔ kúla’g njoroŋ ləm tɔ Gə mba kuru gə goo ŋgəḭ dɔ deḛ gə́ to njéra nédanaje’g.

³ Loo gə́ gin néje lai yə ɓugu-ɓugu ndá See ɗi ɓa njemeekarabasur lé a ra wa.

⁴ Njesigənea̰ si mee kəi’g ləa gə́ to gə kəmee doi lé ya. Njesigənea̰ lé kalimbai ləa to mee dara’g, Kəmee ɓa aa ne loo gərərə ləm, Kəmee lé tən ne dəwje soo-soo ləm tɔ.

⁵ Njesigənea̰ lé naa meekuru lə njemeekarabasur ya. Nɛ njemeeyèr gə njera né kərm-kərm lé yeḛ ə̰ji dee bəḭ-bəḭ.

⁶ Njesigənea̰ ar kɔr pər, gə pər, gə kṵji pər gə́ teḛ bilim-bilim lé Er dɔ njémeeyèrje’g to gə́ ndi bèe ləm, Lel-mal gə́ nuŋga gə́ ɓir lé Yee ɓa gə́ né gə́ wɔji dɔ dee ya ləm tɔ.

⁷ Mbata Njesigənea̰ lé to njemeekarabasur ya Né gə́ to gə dɔ najee lé ɓa taa kəmee rəgm. Deḛ gə́ to njéra nédanaje lé d’a kaa kəmee gərərə ya.