Pakɔsje 100 - Maktub gə́ To gə Kəmee

Pa ɓar dəwje kar dee pidi ne Njesigənea̰

1 Pa pidi lé.

¹ Pa pidi lé. Seḭ dəwje lai gə́ síje dɔ naŋg neelé Ɔrje ndu sí wəl gə rɔlel par gə́ rɔ Njesigənea̰’g.

² Raje né arje Njesigənea̰ gə rɔlel ləm, Reeje nea̰’g gə boo-rɔkal ləm tɔ.

³ Maji kar sí gərje gao To gə́ Njesigənea̰ lé to Ala ya. Yeḛ nja ɓa to njekunda sí ləm, Jeḛ n’toje kea̰-yeḛ nja ləm tɔ. Jeḛ n’toje koso-dəwje ləa ləm, Jeḛ n’toje koso-nékulje Gə́ d’aar loo-ko̰-mu’g ləa ləm tɔ.

⁴ Maji kar sí a̰dje tarəwkəije’g ləa gə pa pidije ləm, A̰dje gadlooje’g ləa gə pakɔsje ləm tɔ. Ilaje riɓar dəa’g arje dɔ ria ai səgərə.

⁵ Mbata Njesigənea̰ lé to gə́ njemaji dum, Meemaji ləa to saar-saar gə no̰, Meenda londoŋ ləa lé ḭ dɔ maree’d gə́ kédé-kédé Mbata lə ŋgaka dəwje-dəwje.