Ojee 8 - Maktub gə́ To gə Kəmee

Njesigənea̰ ɔm ta dɔ Israɛlje’g mbata deḛ pole magəje

¹ Unje to̰to̰ undaje ta sí’g! Njeba̰ lé nar kalaŋ Gə́ dɔ kəi’g lə Njesigənea̰ to gə́ niŋgatə̰də bèe. Mbata deḛ d’uba ta manrɔ ləm d’ya̰ ləm, Deḛ d’al ne dɔ godndum ləm tɔ.

² Deḛ ra né wəl gə́ rɔm’g pana: Jeḛ Israɛlje lé I to Ala lə sí gə́ jeḛ n’gərije ya!

³ Israɛlje lé d’uba né gə́ maji d’yá̰ nai njḛ̀, Bèe ɓa njeba̰ lə dee a tuba dee ne.

⁴ Deḛ d’unda mbaije lə dee Gə goo ndukun ləm el ləm, Deḛ d’unda ŋgan-mbaije lə dee Lal karm m’oo sə dee ləm tɔ. Larnda gə larlɔr lə dee lé Deḛ léḛ dee gə́ magəje, Gelee gə́ nee ɓa d’a tuji ne pugudu ya.

⁵ Seḭje gə́ Samari lé, Njesigənea̰ ə̰ji néndaji ŋgon maŋg lə sí Gə́ seḭ lḛ̀je lé bəḭ-bəḭ. Oŋg ləm ḭ səm pu dɔ dee’g. See ndɔ gə́ ra ɓa a kəwje rɔ sí Kɔs meenda rəw wa.

⁶ Njekɔr gə́ ḭ Israɛl ɓa gə́ njelḛ̀ néndaji ŋgon maŋg lé Ɓó yee to gə́ Ala el, Gelee gə́ nee ɓa néndaji ŋgon maŋg gə́ Samari neelé D’a tədee njigi-njigi.

⁷ Mbata deḛ dubu lel Ndá lel-boo ɓa d’a kinja. D’a kinja dɔ kó nda̰ el, Ko gə́ uba aar jəm lé D’a kiŋga ndujee el tɔ, Esé ɓó lé to keneŋ ndá kara Dəw-dɔ-ɓeeje ɓa d’a sɔ ya.

⁸ Israɛlje d’udu guduru! Ɓasinè deḛ d’isi mbuna ginkoji dəwje gə raŋg’g Asəna gə jo-har bèe.

⁹ Mbata deḛ d’ḭ d’aw Asiri To gə́ mburje gə́ unda rəa ŋgərəŋ bèe, Eprayimje lèbè kəm dee gə nékar Mba kwa ne sə dee baokura.

¹⁰ Lée deḛ lèbè kəm ginkoji dəwje gə raŋg gə nékarje kara Ɓasinè m’a mbo̰ dee dɔ na̰’d. Waga ndá d’a si dan némeeko̰’g gin nékodo gə́ wɔi’g Gə́ mbai dɔ njékaa dɔ dəb ɓeeko̰je D’a gə kunda dɔ dee’g.

¹¹ Eprayimje d’unda loo-nékinjanéməsje Mba ra ne kaiya gə́ kédé-kédé Nɛ loo-nékinjanéməsje neelé Tel sula dee sɔgɔ dan kaiya’g ɓa.

¹² Lée ma m’ndaŋg tornduje ləm lai Gə́ wɔji dɔ godndum kara Deḛ d’oo gə́ né el.

¹³ Néje gə́ deḛ d’inja dee gə́ məs d’arm ma lé Deḛ nja d’usɔ dakas dee ya. Néje neelé taa kəm Njesigənea̰ el, Ɓasinè Njesigənea̰ ar mée olé dɔ néra kori-korije’g lə dee Ndá yeḛ a kar bo̰ néra dee ɔs ta dee’g bɔsɔrɔ: Deḛ d’a tel kaw Ejiptə ya gogo.

¹⁴ Israɛlje d’ar meḛ dee wəi dɔ yeḛ gə́ njekunda dee’g Ndá deḛ d’unda kəi-mbaije ləm, Judaje kara d’ar ɓee-booje gə́ gə siŋga dee lé D’ḭ dɔ maree’d gə́ kédé-kédé ləm tɔ. Nɛ m’a kar pər roo ɓee-booje lə dee ləm, A roo kəi-mbaije lə dee ləm tɔ.