Ojee 7 - Maktub gə́ To gə Kəmee

¹ Loo gə́ ma m’wɔji-kwɔji kaji Israɛl ndá Néra kori-korije lə Eprayimje Gə némeeyèrje lə Samarije teḛ to raga pai-pai Mbata deḛ ra néŋgɔmje ləm, Njéɓogoje d’andə mee kəije’g ləma, Gayim-ɓogoje taa loo gir loo gə́ raga pəl-pəl ləm tɔ.

² Deḛ d’ə̰ji meḛ dee’g pana: Yen nà məəm olé dɔ némeeyèrje’g lə deḛ lai gə́ ra lé el. Ɓasinè lé néra dee gə́ majel aḭ dɔ dee sub Ndá to raga pai-pai kəm’g ya.

³ Gə goo némeeyèrje lə dee lé Deḛ su ne kəm mbai d’ar rəa lelee ne ləm, Gə goo taŋgɔmje lə dee lé Deḛ su ne kəm ŋgan-mbaije lə dee D’ar rɔ dee lel dee ne ləm tɔ.

⁴ Deḛ lai to njémɔdkaiyaje, To d’asəna gə bwa-bṵda Gə́ njekula-bṵda ula pər keneŋ Aree nuŋga kəd-kəd bèe ɓa Yeḛ əw rəa kɔs gel pər ɓəi Saar kar bina gə́ loḭ lé Ḭ ti ne dor-dor ɓa.

⁵ Ndɔ ra naḭ lə mbai lé Ŋgan-mbaije d’oso gə rɔko̰ Mbata mán-nduú gə́ mḭ gə́ d’ai yaa̰ lé. Mbai ɔm na̰’d gə njékula sul dɔ loo’gje.

⁶ Deḛ d’o̰ njuma̰ na̰ D’ar meḛ dee nuŋga to gə́ bwa-bṵda bèe. Oŋg lə dee toɓi loondul’g saar ndá Teḛ gə ndɔ rad lé yḛ́ saar mbudu bib o̰ tɔ.

⁷ Deḛ lai meḛ dee taa pər to gə́ bwa-bṵda bèe, Deḛ rum njégaŋ-rəwtaje lə dee rum-rum, Mbaije lə deḛ lai d’wəi gə goo na̰ goo na̰: Dəw kára kara mbuna dee’g ɓarm gə mba karm m’la səa el.

⁸ Eprayimje pélé na̰ Gə ginkoji dəwje gə́ raŋg ləm, Eprayimje tel to d’asəna gə bina gə́ d’ila Lal tel gelee bèe ləm tɔ.

⁹ Dəw-dɔ-ɓeeje d’ɔr siŋga dee ho̰d, Nɛ deḛ gər el ləm, Ɓuga si taa dee loo Nɛ deḛ gər el ləm tɔ.

¹⁰ Beelé lə Israɛlje ɔr ta ila dɔ dee’g ya, Nɛ lé bèe kara Deḛ tel ree rɔ Njesigənea̰, Ala’g lə dee el ləm, Deḛ tel ndolè gée bèe el ləm tɔ.

¹¹ Eprayimje to d’asəna gə dərnda Gə́ kəmee àr dɔ rəa’g el bèe, Deḛ no̰ ɓar Ejiptəje ləm, Deḛ d’ḭ d’aw Asiri ləm tɔ.

¹² Ɓó lé d’ḭ d’aw kara M’a kila jám ləm no̰ dee’g ləm, M’a kunda dee naŋg rib To gə́ yelje gə́ pə̰ dara’g bèe ləma, M’a kar bo̰ néra dee ɔs ta dee’g Gə goo ta gə́ ma m’ndəji dee ne kédé Loo-mbo̰-dɔ-na̰’g lə dee lé ləm tɔ.

¹³ Meeko̰ a koso dɔ dee’g Mbata deḛ d’aḭ’m! Tuji a koso dɔ dee’g Mbata deḛ d’ila ŋgonkoji dɔm’g el! Ma m’ndiŋga rɔm mba kaji dee ya, Nɛ deḛ pata ŋgɔmje ɓa dɔm’g d’ɔsm ne rəw.

¹⁴ Deḛ no̰ ɓarm gə meendakaḭ el, Nɛ deḛ no̰ sii mbigi-mbigi loo-to dee’g ba, Deḛ mbo̰ dɔ na̰ gə mba kiŋga kó ləm, Gə mán-nduú gə́ sigi ləm tɔ Ndá deḛ d’unda ne rɔ dee ɓad rɔm’g.

¹⁵ Ma m’ndoo dee m’ar ji dee ɓar mèr-mèr, Nɛ lé bèe kara deḛ la̰ji tor majel meḛ dee’g dɔm’g.

¹⁶ Deḛ d’ɔs badm tel gə́ rɔ Njekurdɔloo’g el, Deḛ to d’asəna gə kag ɓandaŋg gə́ nduni koŋ-koŋ. Mbaije lə dee d’a toso ta kiambas’g Mbata kəsta gə́ rusu ta dee tub-tub lé. Yee ɓa a kar dee tel to ne nékogo mee ɓee gə́ Ejiptə’g.