Ojee 10 - Maktub gə́ To gə Kəmee

Tuji loo-pole-magje ləm, gə ɓeeko̰ lə Israɛlje ləm tɔ

¹ Israɛlje to d’asəna gə kag-nduú gə́ andə ul bo̰-bo̰ bèe. Loo gə́ andə njim-njim ndá Deḛ ra loo-pole-magje ur dɔ njé gə́ kédé’g, Loo gə́ ɓee lə dee si dan némajije’g bèdèg ndá Deḛ ra néndajije gə́ to kɔr mbalje gə́ d’unda dee tar lé D’ar dee ndolé lḛd-lḛd D’ar dee maji d’unda njé gə́ kédé.

² Meḛ dee tɔ joo ndá d’a koo kea̰ ya. Njesigənea̰ a gə tɔs loo-pole-magje lə dee tila ləm, A gə tuji néndajije lə dee gə́ to kɔr mbalje lé ləm tɔ.

³ Waga ndá d’a kula na̰ pana: Mbai lə sí godo, Mbata jeḛ m’ɓəl Njesigənea̰ el, Ŋga mbai lé see ɗi ɓa a kaskəm ra kar sí wa.

⁴ Deḛ lé pa taje budu-budu ləm, D’ubu rɔ dee gə taŋgɔm Loo gə́ deḛ man ne rɔ dee d’ar na̰ ləm tɔ. Togə́bè ɓa bo̰ néra dee kara A kuba dee naŋg bus to gə́ kag-táaje Gə́ d’uba dɔ ɓaije gə́ mee ndɔ’g bèe.

⁵ Dəw-mee-ɓeeje gə́ Samari lé Meḛ dee a pélé wəs-wəs dɔ néndaji ŋgan maŋgje-je gə́ léḛ Bet-Aben’g, Koso-dəwje d’a kwa ndòo yoo magəpole lé ləm, Njékinjanéməsje ləa d’a ndəb pəd-pəd gə mbata ləa ləma, Gə mbata lə rɔnduba ləa gə́ a gə sané pa mbuna dee’g lé ləm tɔ.

⁶ Ala neelé d’a kunee kaw səa Asiri Gə mba kar mbai Jareb gə́ nénoji. Kəm sɔḭ a kwa kəm Eprayimje ləm, Israɛlje kara d’a si dan rɔkul’g Mbata né gə́ deḛ d’wɔji-kwɔji ra lé ləm tɔ.

⁷ Samarije gə mbai lə dee d’a sané pa Asəna gə ŋgəw kag gə́ mán ɔr aw ne bèe.

⁸ Dɔ looje gə́ ndəw gə́ Bet-Aben Loo gə́ Israɛlje ra kaiya keneŋ lé D’a tuji pugudu, Kunje gə kun-pɔrɔrɔje D’a kuba loo-pole-magje’g lə dee. D’a kula mbalje pana: Juraje dɔ sí’g! D’a kula dɔdərlooje pana: Ɓuguje dɔ sí’g!

Israɛlje d’a kinja dɔ né gə́ deḛ dubu ya

⁹ Ǝi Israɛlje, un kudee mee ndəa gə́ Gibea’g saar ɓasinè lé Seḭ raje kaiya. Lée neelé deḛ d’aar dɔ gɔl dee’g njaŋg Ŋga see ra rɔ tuji ne njémeeyèrje gə́ Gibea lé See a to nékəmra el wa.

¹⁰ M’a kar bo̰ néra dee ɔs ta dee’g to gə́ məəm ndigi Ndá koso-dəwje d’a kḭ mbo̰ dɔ na̰ rɔ sə dee Loo gə́ d’a tɔ dee gə kúla lar Mbata néra kori-korije lə dee gə́ gɔl joo lé.

¹¹ Eprayimje to d’asəna gə ŋgon maŋg Gə́ ndigi njaa dɔ kó’g mba tal ka̰dee bèe. Nɛ m’a rəm pər gə́ gina gwɔsee’g, M’a kila néməməna̰ gwɔs Eprayimje’g ləm, Judaje d’a ndɔ-ndɔ ndá Njé’g lə Jakob d’a gɔl dɔ naŋgee ləm tɔ.

¹² Maji kar sí dubuje né gə goo meekarabasur Ndá a kinjaje né gə goo meekɔrjol tɔ, Tugaje loo-ndɔ gə́ sigi. To kàr kar sí saŋgje Njesigənea̰ Saar gə mba karee ree ɔm meekarabasur dɔ sí’g.

¹³ Seḭ ndɔje kandə néra gə́ majel ləm, Seḭ injaje néra gə́ kori-korije ləma, Seḭ sɔje kandə néŋgɔmje ləm tɔ. Mbata seḭ ɔmje meḛ sí dɔ rəw-kaw síje’g ləm, Gə dɔ bao-rɔje’g lə sí gə́ bula digi-digi ləm tɔ.

¹⁴ Koso-dəwje lə sí d’a kaw dɔ na̰’d pum-pum, Tɔɓəi kəi-kaar-kɔgərɔje lə sí lai d’a tuji To gə́ tuji ne Salman-Bet-Arbel ndɔ rɔ’g Loo gə́ deḛ kunda ne ko̰ ŋganje Gə ŋgan deeje vaga-vaga tɔl dee ne bèe.

¹⁵ Aa ooje, seḭ gə́ Betel lé D’a ra sə sí togə́bè ya Mbata némeeyèrje lə sí al dɔ loo sula. Loo gə́ kàr uba kuji’g lé Ndá mbai gə́ Israɛl a tuji pugudu ŋga.