Njekillamber 9 - Maktub gə́ To gə Kəmee

Si kəmba lə dəw lé kuree əw el

¹ Ma m’ə̰ji ta néje neelé lai məəm’g yaa̰ ləm, M’saŋg gin dee ləm tɔ ndá Ma m’oo to gə́ njéra nédanaje Gə njékəmkàrje gə kulaje lə dee To meḛ ji Ala’g lé ləm, Meenoji gə kḛji bəḭ-bəḭ kara To meḛ jia’g ləm tɔ. Nɛ dəwje ɓa gər né el, Néje lai teḛ dɔ dəwje’g lai ya.

² Néje lai to no̰ dee’g ɓəi. Né gə́ teḛ dɔ njera nédana’g To kára ba asəna gə né gə́ teḛ dɔ njemeeyèr’g ləm, Dɔ dəw gə́ maji gə́ ra né gə́ àr ŋgad-ŋgad lé To kára ba asəna gə né gə́ teḛ dɔ dəw gə́ rəa mina̰’g ləm tɔ. Né gə́ teḛ dɔ dəw gə́ inja nékinjaməs’g To kára ba asəna gə né gə́ teḛ dɔ dəw gə́ inja nékinjaməs el ləm, Dəw gə́ maji lé né teḛ dəa’g To gə́ teḛ dɔ njekaiya’g bèe ləma, Yeḛ gə́ ubu rəa lé né teḛ dəa’g To gə́ teḛ dɔ yeḛ gə́ ɓəl kubu rəa lé ləm tɔ.

³ Né kára gə́ majel mbuna néje’g lai Gə́ ra dɔ naŋg neelé ɓa nee: Né gə́ kára ba teḛ dɔ dəwje’g lai ya. Gelee gə́ nee ɓa meḛ ŋgan-dəwje lé Meeyèr gə néra mbə ɓa Taa meḛ dee pəl-pəl loo si kəmba’g lə dee Saar d’aw ne ɓee lə njé gə́ d’wəi’g tɔ.

⁴ Meekundayel to keneŋ Mbata lə deḛ lai gə́ d’isi kəmba lé Mbata bisi gə́ aw kəmba lé Maji unda toboḭ gə́ wəi ya.

⁵ Tɔgərɔ ya, deḛ lai gə́ d’isi kəmba lé Gər gao to gə́ d’a gə kwəi ya. Nɛ deḛ gə́ d’wəi mba̰ lé Gər né kára el ləm, Nékoga-dɔ-ji dee kara godo ŋga ləm tɔ Mbata meḛ dəwje wəi dɔ dee’g mba̰.

⁶ Meenoji gə kḛji bəḭ-bəḭ lə dee ləm, Gə kəmkəḭ lə dee ləm tɔ lé tuji mba̰. D’a kiŋga né gə́ wɔji dɔ dee pai bèe Mbuna néje lai gə́ ra dɔ naŋg neelé el ŋga.

⁷ Ɔd aw o̰ muru ləi gə rɔlel ləm, Gə ai mán-nduú ləi gə meelel ləm tɔ Mbata néraije lé taa kəm Ala mba̰ ya.

⁸ Gə ndɔje lai lé ar kubuje ləi ndá kələw-kələw ləm, Lal kwa dɔi gə ubu el ləm tɔ.

⁹ Al rɔi gə dené gə́ i undá dan kəmi’g lé Ndɔje lai gə́ i si ne kəmba gə mḭdé ba Gə́ Ala ari dɔ naŋg neelé, Ndɔje ləi lai gə́ gə mḭdé ba lé. Mbata yee ɓa gə́ né gə́ wɔji dɔi Loo gə́ i si ne kəmba loo-kula’g ləi Gə́ i ra dɔ naŋg nee.

¹⁰ Néje lai gə́ jii iŋga gə mba ra gə siŋgai ndá gə́ ra ya. Mbata kula gə́ ra, əsé kḛji ta, əsé gosonégər, əsé kəmkàr Godo njabaw loo gə́ i si aw gə́ keneŋ lé.

Kəmkàr lə dəw lé aree teḛ ne kɔr ta-ta el

¹¹ Ma m’tel m’oo dɔ naŋg nee ya ɓəi. To gə́ ŋgwɔd lé To gə mba njékaḭgwɔd kalaŋje ba el ləm, Rɔ lé kara wɔji dɔ bao-rɔje ba el ləm, Nésɔ lé wɔji dɔ njékəmkàrje ba el ləm, Nékiŋga kara wɔji dɔ njégosonégərje ba el ləma, Riɓar kara wɔji dɔ bao-gosɔnégərje ba el ləm tɔ. Mbata néje lai teḛ dɔ dee’g Gə goo ndəaje gə kàreje ɓa.

¹² Dəw lé gər kàree gə́ wɔji dəa lé el To gə́ ka̰jije gə́ d’wa dee gə bura Gə́ to néyoo lé kara gər bèe el ləm, To gə́ yelje gə́ d’wa dee gə jàm gər bèe ləm tɔ. To gə́ deḛ bèe lé dəwje kara Némeeko̰ uba dee wa dee rès Mee ndəa gə́ teḛ dɔ dee’g wai lé tɔ.

¹³ Ma m’oo nékəmkàr kára Dɔ naŋg neelé gə́ to né gə́ boo ya tɔɓəi.

¹⁴ Ŋgon ɓee-boo kára to keneŋ Ndá dəwje gə́ d’isi keneŋ bula el tɔ. Ndá mbai gə́ to njesiŋgamoŋ kára ree aḭ dəa sub gə rɔ. Yeḛ uba dɔndalje gə́ boo-boo oma̰ ne səa.

¹⁵ Dəw kára gə́ to njendoo gə́ kəmee àr si keneŋ. Yeḛ nja taa ɓee-boo neelé gə kəmkàr ləa ila tar. Nɛ dəw kára kara Ar mée olé dɔ dəw gə́ to njendoo’g neelé el.

¹⁶ Ma m’pana: Kəmkàr lé maji unda siŋgamoŋ. Nɛ kəmkàr lə njendoo lé d’ə̰ji bəḭ-bəḭ ləm, Ta peaje kara dəw ur mbia oo ne el ləm tɔ.

¹⁷ Taje lə njékəmkàrje Gə́ dəwje d’oo loo gə́ d’isi lɔm keneŋ lé Maji unda ndu-kunda lə dəw Gə́ o̰ ɓee mbuna mbəje’g.

¹⁸ Kəmkàr lé maji unda nérɔje. Nɛ njekaiya gə́ kára ba lé tuji némajije bula.