Njekillamber 8 - Maktub gə́ To gə Kəmee

¹ See na̰ ɓa to tana gə njekəmkàr Gə njegər kɔr gin néje wa. Kəmkàr lə dəw lé Ar kəmee ndɔḭ ne wər-wər ləm, Ar kəmee gə́ kas ŋgɔgərɔ lé Tel to ne ɓəd ləm tɔ.

Kila ŋgonkoji dɔ mbai’g lé to nékəmkàr

² Yen! Ilaje ŋgonkoji dɔ ta’g lə mbai lé Mbata ta manrɔ lə Ala ya.

³ Ndəbje-ndəb kḭ nea̰’g kaw el ləm, Aarje njaŋg dɔ néra gə́ majel’g el ləm tɔ. Mbata yeḛ lé askəm ra néje lai to gə́ mée ndigi,

⁴ Mbata tapa lə mbai lé To gə́ ta siŋgamoŋ ya. See na̰ ɓa askəm dəjee pana: See ɗi ɓa i aw ra bèe wa.

⁵ Yeḛ gə́ aa dɔ torndu kər-kər lé A gər né gə́ majel el ləm, Njekəmkàr lé mée gər Dɔ kurloo ləm gə rəwta-gaŋg ləm tɔ.

⁶ Mbata néje lai lé Ndɔ gə́ wɔji dɔ dee to keneŋ ləm, Rəwta-gaŋg gə́ wɔji dɔ dee to keneŋ ləm tɔ, Loo gə́ némeeko̰ al dɔ dəw sula lé.

⁷ Yeḛ gər né gə́ a gə teḛ dəa’g el. See na̰ ɓa a kulá pana: Né neelé a gə teḛ togə́bè wa.

⁸ Dəw kára kara siŋgá As kɔg ndilee teḛ el ləm, Siŋgamoŋ ləa kára kara Askəm kɔg ndɔ kwəi ləa el ləm tɔ. Rɔ neelé dəw kára kara Askəm kɔr rəa keneŋ el ləm, Meeyèr lé Askəm kaji njémeeyèrje el ləm tɔ.

Takə̰ji gə́ wɔji dɔ si kəmba lə dəwje

⁹ Ma m’oo néje lai neelé Ndá ma m’wɔji məəm njaŋg Mba gər néje lai dɔ naŋg neelé. Ndɔ gə́ dəw dum dɔ maree Aree si ne dan meeko̰’g to gən.

¹⁰ Togə́bè ɓa m’oo njémeeyèrje gə́ dubu dee lé D’aw loo-kwa-rɔ dee’g Nɛ deḛ gə́ ra né gə goo rəbee lé D’ḭ d’aw loo gə́ to gə kəmee’g Ar deḛ gə́ mee ɓee-boo’g lé Meḛ dee wəi dɔ dee’g. Yee gə́ bèe lé kara to né gə́ gə mḭdé ba ya ɓəi.

¹¹ Mbata ta gə́ gaŋg dɔ néraje gə́ majel’d Gə́ d’aree aw ne lée’g béréré Dɔ dee’g kalaŋ el lé Ɓa ar dəwje d’wɔji ne néra gə́ majel Meḛ dee’g ra gə́ kédé-kédé.

¹² Lé bèe kara ɓó lé Njekaiya ra némajel as gɔl tɔl (100) Si ne ŋgəd-ŋgəd kuree əw kara Ma m’gər gao to gə́ si dan maji’g to Mbata lə deḛ gə́ ɓəl Ala Deḛ d’ila koji dəa’g ya.

¹³ Nɛ si dan maji’g lé To mbata lə njemeeyèr el ləm, Ndɔje ləa d’a kḭ dɔ maree’g el To gə́ ndil kag kara kuree əw el bèe ləm To mbata yeḛ ɓəl Ala el.

¹⁴ Né gə́ to lée’g el gə́ ra dɔ naŋg neelé ɓa nee: Njéra nédanaje lé Né gə́ majel teḛ dɔ dee’g to gə́ njémeeyèrje bèe ləm, Njémeeyèrje kara Né gə́ maji teḛ dɔ dee’g to gə́ njéra nédanaje bèe ya ləm tɔ. Yee ɓa m’pana: Yee gə́ neelé to né gə́ gə mḭdé ba ya tɔɓəi.

¹⁵ Bèe ɓa ma m’ra ne rɔlel Mbata si maji lə dəw dɔ naŋg nee lé To sɔ né gə kai né gə ra rɔlel ya ba. Yee neelé ɓa gə́ né Gə́ deḛ səa d’a kaw na̰’d loo kula’g ləa Mee ndɔje lai Gə́ Ala aree si ne kəmba dɔ naŋg nee lé.

¹⁶ Loo gə́ ma m’wɔji məəm’g njaŋg Gə mba gər kəmkàr ləm, Gə mba tən ne néje gə́ dəs dɔ naŋg nee ləm tɔ lé Mbata dan kàrá əsé loondul’g lé kara Ɓi wa kəm dəw el

¹⁷ Ndá ma m’oo kulaje lai gə́ Ala ra ləm, M’oo to gə́ dəw askəm kiŋga néje Gə́ ra dee dɔ naŋg neelé el ləm tɔ. Yeḛ saŋg dao ne yaa̰ ya nɛ yeḛ iŋga el. Ɓó lé njekəmkàr ndigi gər kara yeḛ askəm gər el tɔ.