Njekillamber 7 - Maktub gə́ To gə Kəmee

Né gə́ maji unda maree

¹ Ri dəw gə́ ɓar gə́ majee lé Maji unda ubu gə́ ə̰də sululu ləm, Ndɔ kwəi lə dəw lé Maji unda ndɔ kojee ləm tɔ.

² Kaw kəi-kwa-ndòo-yoo’g lé Maji unda kaw kəi-muru-gad’g. Mbata lé neelé to gə́ rudu ndɔ lə dəwje lai ləm, Yeḛ gə́ si lée’g kara A kḛji ne ta dɔ néje’g neelé ləm tɔ.

³ Si gə meeko̰ maji unda kogo. Mbata si dan kəmtondoo’g lé A kar rɔ dəw lelee ɓəi.

⁴ Mee njékəmkàrje lé To gə́ dɔ kəi-kwa-ndòo-yoo’g, Nɛ meḛ mbə-dəwje lé To gə́ dɔ kəi-ra-rɔlel’g ɓa ləm tɔ.

⁵ Kur mbi koo ta ndaŋg lə njekəmkàr lé Maji unda kur mbi koo pakɔs lə mbəje.

⁶ Mbata to gə́ kunje gə́ ndubu rududu Gel əb-kɔb-né’g bèe lé Kogo lə mbəje kara to togə́bè ya tɔ. Yee gə́ nee kara to gə́ né gə́ gə mḭdé ba ya ɓəi.

⁷ Kula kəm dəwje ndòo lé Ar njekəmkàr tel ne mbə ləm, Nḛ́dogo-gel kara tuji kəmkàr lə dəw ləm tɔ.

⁸ Tɔl ta né maji unda kun kudee ləm, Kila mee po̰ maji unda beelé ləm tɔ.

⁹ Maji kari ḭ kalaŋ ra oŋg el Mbata oŋg lé ra ɓee meḛ mbəje’g.

¹⁰ Maji kari dəji rɔi pana: See ban ɓa ndɔje gə́ dəs kédé lé Maji d’unda ndɔje gə́ ɓasinè lé wa lé, pa bèe el. Mbata dəjee gə́ bèe lé To kəmkàr ɓa i dəji ne bèe el.

¹¹ Kəmkàr lé maji asəna gə kwa nénduba ləm, Maji mbata lə deḛ gə́ d’isi kəmba ləm tɔ.

¹² Mbata kəmkàr lé ɔn dɔ dəw To gə́ lar ɔn ne dɔ dəw bèe. Maji lə gər-gin-né lé kara Ar njékəmkàrje lé d’isi ne kəmba.

¹³ Tə̰ kula ra Ala oo: See na̰ ɓa askəm ndɔji né gə́ Ala aree rugu lé wa.

¹⁴ Mee ndɔ si dan maji’g lé Arje rɔ sí lel sí ləm, Mee ndɔ si dan meeko̰’g lé kara Ǝ̰jije ta meḛ sí’g ləm tɔ. Ala nja ɓa gə́ njera dee joo bɔr Gə mba kar dəw gər ne né Gə́ a gə teḛ dəa’g gogo lé el.

¹⁵ Néje nee lai gə́ ma m’oo Mee ndɔje’g ləm gə́ gə mḭdé ba lé ɓa nee: Dəw gə́ njera nédanasur Wəi dan néra gə́ danasur’g ləa ləm, Dəw gə́ njemeeyèr Si gə ləbee-ləbee dan meeyèr’g ləa ləm tɔ.

¹⁶ Arje né ra sí gə́ gə dɔ najee Al dɔ loo el ləm, Raje rɔ sí gə́ njékəmkàrje gə́ ur dɔ loo el ləm tɔ. See a tujije rɔ sí bèe gə mba ɗi wa.

¹⁷ Ar meeyèr ləi al dɔ loo el ləm, Gə́ to mbə el ləm tɔ. See gelee ban ɓa i ndigi kwəi ɓad ɓa Gə mba kar ndɔ ləi as wa.

¹⁸ To maji kar sí waje ta gə́ kára neelé kɔgərɔ Lal kya̰ goo yee gə́ kára neelé yɔgɔ tɔ. Mbata yeḛ gə́ ɓəl Ala ndá A teḛ ta néje’g neelé lai ya.

¹⁹ Kəmkàr lé ar njekəmkàr Siŋgá ur ne dɔ njékɔrno̰ dəwje gə́ dɔg Gə́ d’isi mee ɓee-boo’g.

²⁰ Dəw gə́ nje ra né gə́ danasur Gə́ lal ra kaiya lé godo dɔ naŋg nee

²¹ Tɔɓəi taje lai gə́ pa lé Maji kɔm məəi dɔ’g el Nà banelə a koo ta ndɔlje Gə́ kuraje ləi d’ila dɔi’g lé.

²² Mbata i gər məəi’g gao, To gə́ gɔl bula lé i nja kara ila ndɔl Dɔ njé gə́ raŋg’d tɔ.

²³ Ma m’naa néje neelé lai Gə goo kəmkàr ndá m’pana: M’a to njekəmkàr. Nɛ kəmkàr lé nai səm əw ya ɓəi.

²⁴ Né gə́ nai əw ləm gə gelee uru yaa̰-yaa̰ ləm tɔ lé See na̰ ɓa askəm teḛ keneŋ wa.

²⁵ Ma m’wɔji məəm njaŋg gə mba gər ləm, Gə mba kə̰d gelee ləma, gə mba saŋg kəmkàr Gə mba gər gin néje neelé ləm tɔ Tɔɓəi mba gər mbə lə meeyèr ləm, Gə mbə lə dɔ tel wagəsa ləm tɔ.

²⁶ Ndá ma m’oo to gə́ dené Gə́ mée to asəna gə gum gə ba̰də bèe ləm, Jiaje to to gə́ kúla tɔ né ləm tɔ lé To né gə́ adə unda yoo. Dəw gə́ taa kəm Ala rəgm Ɓa teḛ meḛ ji dené’g neelé Nɛ yeḛ gə́ to njekaiya ndá Yeḛ wá ne kérég.

²⁷ Njekilamber pana: Aa oo, yee ɓa gə́ né gə́ ma m’iŋga Gə goo tən gə́ ma m’tən néje gə goo na̰ goo na̰ Gə mba gər ne gin dee lé.

²⁸ Aa oo, né gə́ m’saŋg ya Nɛ m’iŋga el ya saar. Ma m’iŋga diŋgam kára mbuna deḛ gə́ tɔl-dɔg’d (1.000). Nɛ mbuna denéje’g lai lé Ma m’iŋga dené kára keneŋ el.

²⁹ Né gə́ kára ba lé, aa oo, Né gə́ ma m’iŋga lé ɓa nee: Ala nja unda dəwje danasur ya. Nɛ deḛ ɓa saŋg néje bula gə́ to lée’g el.