Njekillamber 4 - Maktub gə́ To gə Kəmee

Néra gə́ lal najee dɔ naŋg nee lé

¹ Tɔɓəi ma m’aa loo ndá ma m’oo nékəmndooje lai gə́ ra gə na̰ dɔ naŋg nee ndá Aa oo, no̰ wa deḛ gə́ d’ula kəm dee ndòo lé jiim Nɛ dəw gə́ njegɔl meḛ dee godo! Njékula kəm dee ndooje Ra sə dee né kədərə yaa̰ Nɛ njegɔl meḛ dee godo!

² Ma m’oo to gə́ dəwje gə́ d’wəi mba̰ lé Rɔlel lə dee ur dɔ rɔlel lə deḛ gə́ d’isi kəmba ɓəi.

³ Yeḛ gə́ d’ojee el ɓəi gə́ oo némajelje lai Gə́ ra dɔ naŋg nee el ɓəi lé Rea lelee unda dee-deḛ gə́ gel joo neelé tɔ.

⁴ Ma m’oo to gə́ kula gə́ rara gə goso kula gə́ rara lé Ar kəm njeboatakəi lə debee neelé əḭ dəa’g. Yee nee kara to né gə́ gə mḭdé ba ya ləm To gə́ ŋgwɔd gə́ kaḭ goo lel’g ləm tɔ.

⁵ Mbə-dəw lé ɔm jia kaaree’g si ndá Wəi ne yoo ɓoo ya.

⁶ Kar né rusu jii gə́ kára tub kari si ne lɔm Maji unda kula ro̰dubu loo kula’d Gə́ to kaiŋgwɔd goo lel’g ɓa rusu jii joo bɔr ya.

⁷ M’aa loo ndá m’oo néje gə́ gə mḭdé gə́ dɔ naŋg nee ya ɓəi Gə́ to né gə́ kari ba dɔ naŋg neelé ya ɓəi.

⁸ To gə́ dəw si gə karee ba Lal njekorè dəa gə́ raŋg joo ləm Lal ŋgonee gə́ diŋgam əsé ŋgokea̰ ləm tɔ. Né ləa kara godo ləm Rudu kulaje ləa lai kara un el ləm Nébaoje ləa kara as kəmee el ləm tɔ. See gə mbata lə na̰ ɓa m’ra ne kula M’ɔg ne rɔm dɔ nérɔlelje’g wa. Lé bèe kara yee neelé To gə́ né gə́ gə mḭdé ba ya ɓəi ləm, To né gə́ majel ləm tɔ.

⁹ Dəwje gə́ joo lé Maji unda dəw gə́ gə karee ba. Mbata d’a kiŋga nédɔji dee yaa̰ loo-kula’g lə dee.

¹⁰ Mbata ɓó d’a gə koso ndá Yeḛ gə́ kára a kwa ji maree lé kuree tar. Nɛ dəw gə́ gə karee ba lé ɓó lé oso ndá Dəw gə́ raŋg gə́ a kunee kuree tar lé godo.

¹¹ Tɔɓəi ɓó lé dəwje gə́ joo lé To na̰’d ndá rɔ dee a nuŋga so ya. Nɛ yeḛ gə́ to gə́ karee ba lé See rəa a nuŋga to gə́ ban wa.

¹² Ɓó lé dəw gə́ gə karee ba ɓa maree dum dəa ndá Dəwje gə́ joo lé d’askəm dum dəa-yeḛ tɔ. Tɔɓəi kúla gə́ kunda na̰’d kəm munda lé A gaŋg kalaŋ el tɔ.

¹³ Ŋgon gə́ njendoo gə́ kəmee àr lé Maji unda mbai gə́ ɓuga Gə́ to mbə ləm gə gər takwɔji-kəmkàr el ləm tɔ.

¹⁴ Mbata ŋgon neelé lé yeḛ ḭ kəi-daŋgai’g Esé d’ojee gə́ njendoo mee ɓee’g ləa kara Yeḛ askəm tel to njeko̰ɓee ya.

¹⁵ Ma m’oo dəwje lai gə́ d’isi kəmba dɔ naŋg nee Gə ŋgon gə́ a gə kḭ taa tor mbai lé.

¹⁶ Dəwje lai gə́ yeḛ to gə́ dəw dɔ dee lé Dəw askəm tura dee el. Lé bèe kara ginka dəwje gə́ d’a gə ree gogo lé D’a kal rɔ dee kwɔji ne dəa el. Mbata yee neelé kara to gə́ né gə́ gə mḭdé ba ya ləm, To gə́ kaiŋgwɔd goo lel’g ləm tɔ.

Unda kəmkàr dɔ rɔi’g loo-kwa-Ala-məəi’g

¹⁷ Maji kari aw mee kəi Ala’g lé Lal kḛji gelee el Nɛ aw keneŋ mba kur mbii koo ne ta lé Maji unda kun nékinjaməs kar.