Njéga̰g-Rəwtaje 5 - Maktub gə́ To gə Kəmee

Pakɔs lə Debora

¹ Mee ndəa’g neelé Debora ɔs pa nee gə Barak, ŋgolə Abinoam lé na̰’d pana:

² Loo gə́ njé gə́ Israɛl d’isi pèrèrè mba rɔ rɔ lé ləm Loo gə́ koso-dəwje d’ḭ gə meḛ dee ya Gə mba kaw rɔ rɔ lé ndá: Pidije Njesigənea̰ gə mbəa ya.

³ Mbaije, urje mbi sí! Ŋgan-mbaije kɔdje mbi sí ilaje tag! M’a gə́ kɔs pa kar Njesigənea̰, Ala lə Israɛlje ya.

⁴ Ǝi Njesigənea̰, loo gə́ i unda loo mee ɓee gə́ Seir teḛ ləm, Loo gə́ i ɔd lam aw gə́ mee ndɔje gə́ Edɔm ləm tɔ lé Naŋg yə ləm, dara léḛ sələlə-sələlə ləma, Kil lə ndi kara tel to mán ləm tɔ.

⁵ Dɔ mbalje d’ula déréré-dèrèrè no̰ Njesigənea̰’g ləm, Sinai nee gə́ to no̰ Njesigənea̰, Ala’g lé lə Israɛlje kara yə ləm tɔ.

⁶ Mee ndəaje’g lə Samgar, ŋgolə Anat, Gə mee ndəaje’g lə Jaɛl to lé rəwje d’wa ŋgɔ njag-njag ləm, Deḛ gə́ d’aw mbá lé d’un kila-rəwje gə́ ɔr goŋ ləm tɔ.

⁷ Mbaije gə́ Israɛl lé siŋga dee godo, Siŋga dee godo ya, Saar njen k’arm ma Debora m’uba naŋg m’ḭta Asəna gə ko̰ ŋgon bèe mee ɓee’g lə Israɛlje.

⁸ Deḛ mbər magəje gə́ sigi: Togə́bè ɓa rɔ to ne tarəwkɔgje’g. D’iŋga dər əsé ko̰ niŋga Rɔ njérɔje gə́ Israɛl gə́ tɔl-dɔg-loo-rɔ-sɔ (40.000) lé el.

⁹ Meem to dɔ mbaije’d gə́ Israɛl ləm, Dɔ koso-dəwje’d gə́ d’isi pèrèrè Gə mba rɔ ləm tɔ. Pidije Njesigənea̰.

¹⁰ Seḭ gə́ ubaje ko̰-mulayḛ̀je-je gə́ ndá ləm, Gə seḭ gə́ nésije lə sí to kubuje gə́ lab naŋg ləma, Gə seḭ gə́ njaaje dan rəw’g ləm tɔ lé Ɔsje pa.

¹¹ Maji kar njéɓandaŋje gə́ d’aar mbuna godə bwa-kai-manje’g lə nékulje lé D’ar ndu dee ɓar d’unda ne no̰ némeemajije lə Njesigənea̰ Gə némeemajije lə njekɔrno̰ Israɛlje ya. Togə́bè ɓa koso-dəwje lə Njesigənea̰ rəm ree tarəwkɔgje’g.

¹² Teḛ kəmi, teḛ kəmi, Debora. Teḛ kəmi, teḛ kəmi ndá ɔs pa kára. Ḭta, Barak, ŋgolə Abinoam Tɔɓəi ree gə deḛ gə́ i wa dee loo-rɔ’g lé.

¹³ Togə́bè ɓa ges koso-dəwje gə́ nai lé Dum dɔ njésiŋgamoŋje ləm, Njesigənea̰ am m’un baŋga dɔ bao-rɔje’g ləm tɔ.

¹⁴ Njéɓeeje gə́ Amalek d’ḭ Eprayim ree ləm, Bḛjamije njaa gooi’g mbuna kudu-njérɔje’g ləm, Mbaije d’ḭ Makir ləma, Ɓé-njérɔje d’ḭ Jabulo̰ ree ləm tɔ.

¹⁵ Mbaije lə Isakarje nai gə Debora ləm, Isakarje kara d’un goo Barak ləm tɔ, D’ulá d’aree un dɔ gɔlee mee wəl-loo’g Mbɔr ŋgan manje’g lə Rubḛ lé. Taje gə́ d’wɔji meḛ dee’g mba ra née lé to taje gə́ boo.

¹⁶ See ban ɓa i nai dan loo-kaar-nékulje’g Gə mba kur mbi koo ne ndu no̰ lə koso-nékulje wa. Mbuna gel-bɔje’g lə Rubḛ lé Taje gə́ d’wɔji na̰ mba ra née lé to taje gə́ boo.

¹⁷ Galaadje gə́ d’isi kel tura-baa gə́ Jurdɛ̰ gə́ nu lé D’uba loo-si dee d’ya̰ el. See gelee ban ɓa Danje d’isi ne meḛ batoje’g ɓəi wa. Aserje kara d’isi dɔ koŋgo baa-boo-kad’g, Deḛ d’wa rɔ dee kəmkaije’g lə dee.

¹⁸ Jabilo̰je to ginkoji dəwje gə́ d’ya̰ rɔ dee d’ar yoo ləm, Neptalije kara ra bèe loo-rɔ’g ləm tɔ.

¹⁹ Mbaije d’ɔr rɔ ree rɔ, Bèe ɓa mbaije gə́ Kana̰ rɔ ne Mee ɓee gə́ Taanak, mbɔr manje gə́ Megido, Nɛ deḛ d’iŋga nébanrɔ kára kara el ləm, Taa lar lə dee kára kara el ləm tɔ.

²⁰ Dan dara’d gə́ tar lé kéréméje ra rɔ, Gə goo rəwje lə dee lé deḛ rɔ ne gə Sisera.

²¹ Kəm-rəw-mán gə́ Kiso̰ unda dee aw sə dee, To kəm-rəw-mán lə njé gə́ ləw Gə́ to kəm-rəw-mán lə Kiso̰. Rɔm, maji kari tuba bao-rɔje naŋg gə gɔli

²² Togə́bè ɓa kaa gɔl kundaje ɓar Gə goo tal gə́ dee tal to gə́ njérɔje lə dee Gə́ d’aiŋgwɔd gə tɔg dee mba taa ne rɔ dee bèe.

²³ Kura lə Njesigənea̰ gə́ dara pana: Ilaje ndɔl dɔ ɓee gə́ Meroj’g, Ilaje ndɔl ya, ilaje ndɔl dɔ dəwje’g ləa, Mbata deḛ ree la gə Njesigənea̰ el ləm, Deḛ la gə Njesigənea̰ mbuna bao-rɔje’g el ləm tɔ.

²⁴ Maji kar dɔ Jaɛl, gə́ to dené lə Heber Gə́ to dəw gə́ Keni lé ai səgərə. Maji kar dɔkaisəgərə nai səa Mbuna denéje lai gə́ d’isi mee kəi-kubuje’g lé.

²⁵ Sisera lé dəji Jaɛl mán ndá Yeḛ aree mbà Mee ŋgo mbai gə́ maji péd-péd’g ɓa Yeḛ aree ne ubu mbà maŋg ya.

²⁶ Jia gə́ kára lé yeḛ wa ne kag gə́ tɔl dəa Nɛ jikɔlee ndá yeḛ wa ne mo̰ lə njékulaje tɔ, Yeḛ unda ne dɔ Sisera tɔ ləm, Ar kwɔji-kəmee tɔ, mbudu gib ləm tɔ.

²⁷ Ŋgira gɔl Jaəl’g lé yeḛ ḭ oso tul keneŋ ləm, Yeḛ oso tul to naŋg gin gɔlee’g ləm tɔ, Lé gə́ yeḛ ḭ keneŋ oso tul lé Yeḛ oso ar kaa mbia pa ɗəŋ.

²⁸ Ko̰ Siseraje aa loo kəmbolè’g Gə́ ba̰də lar to keneŋ gərərə oo ndá Yeḛ no̰ wəl pana: See gelee ban ɓa pusu-rɔ ləa ree kalaŋ el wa. See mba ɗi ɓa pusu-rɔje ləa d’aw jan-jan bèe wa.

²⁹ Denéje gə́ njékəmkàrje gə́ mbuna mar deeje’g d’ilá keneŋ Ndá yeḛ nja tel dəji rəa pana:

³⁰ See d’iŋga nébanrɔ el wa. See deḛ kai na̰ né el wa. Ŋgoma̰də kára əsé ŋgama̰dje joo Mbata dəw gə́ njérɔ kára-kára ləm, Néba̰rɔ gə́ to kubu-ndajije Mbata lə Sisera ləm, Néba̰rɔ gə́ to kubu-ndajije gə́ d’ɔs gə́ kɔs ləma, Kubu-ndaji kára gə kubuje joo gə́ d’ɔs dee ləm tɔ Mbata lə gwɔb njekungaŋga.

³¹ Ǝi Njesigənea̰, ar njéba̰je ləi lai d’udu togə́bè ya. Deḛ gə́ d’undai dan kəm dee’g lé Ar dee to d’asəna gə kàr bèe Loo gə́ yee teḛ ɔs keḭ-keḭ. Yen ŋga ɓee lé to lɔm as ləb rɔ-sɔ ya.