Nɔ̰-ndôo gə́ wɔji dɔ Jerusalem 4 - Maktub gə́ To gə Kəmee

Néɓəl-boo gə́ teḛ mee ɓee-boo gə́ Jerusalem’g

¹ See ɗi togə́bè wa. Larlɔr lé ndɔḭ ləa tuji ŋga. Larlɔr gə́ àr ŋgad-ŋgad lé Tel mina̰ ŋga! Kɔr mbalje gə́ mee kəi gə́ to gə kəmee lé kara Deḛ sané dee kad-kad tɔ-rəwje’g lai-lai ya tɔ.

² Ŋganje gə́ Sio̰ gə́ maji péd-péd Gə́ gad dee asəna gə larlɔr gə́ àr ŋgad-ŋgad bèe lé Ai-i, d’oo dee asəna gə jo a̰ji Gə́ njekuba jo ɓa uba dee bèe.

³ Tálje kara d’ar ŋgan deeje d’il mbà dee Nɛ dəwje gə́ ɓee ləm lé Yeḛ tel to njemeeiyèr To gə́ miruje gə́ d’aw dɔdilaloo’g bèe.

⁴ Ndo̰ ŋgonkas lé al oso raga Mbata kṵdaman gə́ ɔree loi lé ləm, Ŋganje dəji nésɔ ləm tɔ Nɛ dəw kára kara un nésɔ ar dee el.

⁵ Dəwje gə́ kédé to njékusɔ néje Gə́ maji-maji lé kara D’wəi mburug-mburug dan rəw’g ləm, Deḛ gə́ kédé to njékula kubu Gə́ bḭ-maji gə́ ndul piro-piroje lé kara Deḛ rogo naŋg dan siḭ néje’g ləm tɔ.

⁶ Bo̰ néra koso-dəwje ləm gə́ ɔs ta dee’g lé To ɓəl yaa̰ unda né gə́ teḛ dɔ Sɔdɔm’d Gə́ tuji to gə́ kəm gə́ tuga jib bèe Lal kar dəw un jia naree ne.

⁷ Kédé lé rɔ mbaije ləa ndɔḭ unda kwɔji ləm, Nda lə dee kara ur dɔ mbà’g ləm tɔ, Rɔ dee kas pəl-pəl unda jər gə́ ɓaree korail ləm, Kəm deḛ lai lé to asəna gə jər Gə́ ɓaree sapir lé ləm tɔ.

⁸ Ɓasinè rɔndɔḭ lə dee tel ndul kɔl-kɔl Unda jo-kul ləm, Loo gə́ dee teḛ dan rəw’g kara Dəwje gər dee el ləm tɔ, Ndar rɔ dee lé tia̰ dɔ siŋga dee’g Aree tudu kurum-kurum to gə́ kir bèe ya.

⁹ Deḛ gə́ d’wəi yoo-kiambas lé ndá Meḛ ti mbidi aree maji yaa̰ Unda dee-deḛ gə́ d’wəi yoo-ɓoo ɓa Guru ne naŋg lal kiŋga nésɔ dee.

¹⁰ Denéje gə́ to njémeekawtaḭ-taḭje ya Ndiri ŋgan deeje ɓa d’aree to nésɔ dee Dan nékəmndoo gə́ teḛ dɔ koso-dəwje’g lé ləm tɔ.

¹¹ Njesigənea̰ ɔr suna meekḭ jugugu ləa, Yeḛ ɓugu oŋg ləa gə́ nuŋga kəd-kəd lé tɔ. Yeḛ ula pər mee ɓee gə́ Sio̰’g Aree roo gin ɓee lé dula-dula.

¹² Mbaije əsé dəwje lai gə́ dɔ naŋg neelé D’a kənji to gə́ njerɔ sə dee gə́ to njeba̰ Gə́ a kandə tarəw ɓee gə́ Jerusalem gə dɔ rəa el.

¹³ Gelee wɔji ne dɔ kaiya ra njéteggintaje ləa ləm, Gə néra kori-kori lə njékinjanéməsje ləa Gə́ d’ila məs njémeekarabasurje naŋg Kari ba lé ləm tɔ.

¹⁴ Deḛ d’ila mbir-mbir dan rəwje’g Asəna gə njékəmtɔje bèe, Məs wa rɔ dee mbəgə-mbəgə. Dəw askəm kɔrɔ rɔ kubuje lə dee el.

¹⁵ Dəwje lai ya d’ula dee pana: Ɔdje gə́ raŋg, Seḭ gə́ toje dəwje gə́ mina̰ lé Ɔdje gə́ raŋg ɓó ɔrɔje rɔ dee el. Deḛ d’aḭ d’aw gə́ yo gə́ nee. Ar dee pata mbuna ginkoji dəwje gə́ raŋg’g pana: D’a kiŋga loo-si dee mbuna neḛje’g el ŋga.

¹⁶ Njesigənea̰ nja ɓa sané dee kad-kad Yeḛ un kəmee dɔ dee’g rəw ləm tɔ. Dəw ila riɓar dɔ njékinjanéməsje’g el ləm, D’oo kəmtondoo lə ŋgatɔgje el ləm tɔ.

¹⁷ Kəm sí lé wa kor kor-kor ya ɓəi Ar sí j’isi ŋginaje ne njela sə sí kərm Nɛ jeḛ ŋginaje pi. Jeḛ n’telje kəm sí lai gə meekundayel Par gə́ rɔ ginkoji dəwje gə́ raŋg kára’g Nɛ deḛ ree taa dɔ sí el tɔ.

¹⁸ Deḛ d’un godə gɔl sí Mba kɔg sí loo kaw looje’g lə sí, Rudu ndɔ lə sí aw gə́ nee dəb ŋga Ar ndɔje lə sí as lé mba̰. Ar ka̰ síjeḛ lé godo ŋga!

¹⁹ Njékula kəm sí ndooje lé Rɔ dee wɔilɔ pélé-pélé unda niŋgatə̰dəje Gə́ d’aw pə̰ dara’g bèe, Deḛ korə sí dɔ mbalje’g ləm, Deḛ d’um sí dɔdilaloo’g ləm tɔ.

²⁰ Yeḛ gə́ kəmə le sí to mee jia’g lé, Yeḛ gə́ Njesigənea̰ wa dəa gə ubu lé Oso mee bwaje’g lə dee, Yeḛ gə́ jeḛ m’paje ta ləa m’pana: J’a síje kəmba ndilee’g Mbuna ginkoji dəwje gə raŋg’g lé.

²¹ Maji kari al rɔi gə meendakaḭ I ŋgoma̰də gə́ Edɔm gə́ si mee ɓee gə́ Uts lé Mbata bai-oŋg neelé a teḛ rɔi’g ya, I a kai karee tɔli ndá i a kaw kudi dum tɔ.

²² Néra kori-kori ləi lé d’ɔr dɔi’g mba̰, I ɓee gə́ Sio̰ lé, Dəw a kwai ɓər el ŋga, Nɛ i ɓee gə́ Edɔm lé Yeḛ a kar bo̰ néra kori-kori ləi ɔs tai’g ləm, Yeḛ a kila kaiyaje ləi gə́ raga ləm tɔ.